Muri Venezuela, Perezida w’inteko ishinga amategeko, Juan Guaido, arahamagarira amahanga kumushyigikira bakumvisha Perezida Nicolas Maduro kuva ku butegetsi hakimakazwa demokarasi mu gihugu.
Uyu munyapolitike utavuga rumwe na leta yatangaje ko ari umukuru w’igihugu w’agateganyo kugera ku matora.
Mu nyandiko aherutse kwandika mu kinyamakuru The New York Times Guiado yavuze ko ibihugu birenga 50 bimufata nk’umukuru w’igihugu w’agateganyo.
Leta zunze ubumwe z’Amerika nazo zimufata nk’umukuru w’igihugu w’agateganyo.
Guiado anavuga ko amaze kugirana ibiganiro mw’ibanga n’abasirikali bakomeye akaba akomeje no guhamagarira abandi basilikali kwitandukanya n’ubutegetsi bwa Maduro.
Kuri uyu wa gatatu Guiado yahamagariye abaturage gukomeza imyigaragambyo imaze igihe iba mu gihugu.
Imvururu zo muri Venezuela zatewe n’abatemera amatora y’umukuru w’igihugu yabaye mu mwaka ushize. Bavuga ko Maduro yayashyizemo uburiganya kugirango ayatsinde. Barangajwe imbere na Juan Guaido, w’imyaka 35 y’amavuko.
Facebook Forum