Uko wahagera

Depite Bobi Wine Yongeye Gutabwa muri Yombi muri Uganda


Bobi Wine

Polisi yamutaye muri yombi nyuma y’uko atumijwe n’urwego rw’iperereza ku byaha by’urugomo, kuri uyu wa mbere mu gitondo.

Polisi muri Uganda yongeye guta muri yombi kuri uyu wa mbere, umuririmbyi w’ikirangirire akaba n’umudepite Bobi Wine. Hari hashize iminsi ibiri gusa akuriweho igihano cyo gufungishwa ijisho iwe mu rugo. Umwe mu bamwunganira hamwe n’umuvugizi wa polisi bavuze ko ari umwe mu bashobora guhangana perezida Museveni mu matora.

Bobi Wine ufite imyaka 37 y’amavuko abonwa nk’umwe mu bantu bakiri bato bakuze ku ngoma ya Museveni, ariko ushaka ko ibintu bihinduka. Indirimbo ze zirwanya guverinema zamufashije gutsindira umwanya mu nteko ishingamategeko.

Polisi yamutaye muri yombi nyuma y’uko atumijwe n’urwego rw’iperereza ku byaha by’urugomo, kuri uyu wa mbere mu gitondo. Byavuzwe n’umwe mu bamwunganira imbere y’amategeko, Asuman Basalirwa.

Yongeyeho ko ubu noneho atamenyeshejwe icyo yafatiwe.

Wine yinjiye mu nteko ishinga amategeko mu 2017. Imwe mu ndirimbo ze yarimo amagambo agira ati: “Abarwaniye ukwishyira ukizana bahindutse abayobozi b’igitugu”. Ni mu gihe izindi ndirimbo zasaga n’izumvikanisha ko Museveni yagumye ku butegetsi igihe kirekire cyane.

Umuyobozi wa Uganda Yoweri Kaguta Museveni, ufite imyaka 74 y’amavuko, ari ku butegetsi kuva aburwaniye mu 1986, ariko afite umugambi wo kwongera guhatanira manda ya gatandatu ku buyobozi.

Wine afungiye kuri sitasiyo ya polise mu bilometero 30 uvuye mu burasirazuba bw’umurwa mukuru Kampala. Byavuzwe n’umwunganira mu mategeko, Basalirwa. Umuvugizi wa polise Fred Enanga, yemeje itabwa muri yombi rya Bobi Wine. Yabwiye ibiro ntaramakuru by’abafaransa AFP ati: “Ari kumwe na Polise kandi arimo guhatwa ibibazo”.

Facebook Forum

XS
SM
MD
LG