Imiryango iharanira uburenganzira bwa muntu yo muri Kenya yakoresheje imyigarambyo i Nairobi imbere y’Urukiko rw’ikirenga n’Inteko ishinga amategeko. Basabye ko Depite w’Umuganda Robert Kyagulanyi, a.k.a Bobi Wine, n’abo bafatiwe hamwe bagera kuri 300, barimo abandi badepite batanu, bafungurwa. Basabye kandi leta ya Kenya kwamagana ifungwa ryabo.
Naho umuryango mpuzamahaganga uharanira uburenganzira bw’itangazamakuru CPJ, ufite icyicaro i New York muri Leta zunze ubumwe z’Amerika, uramagana icyo wita “igitero ku banyamakuru” batanu i Kampala muri Uganda.
Batawe muri yombi kuwa mbere, ku italiki ya 20/08/2018, barimo bakora akazi kabo ku myigaragambyo y’abaturage bashyigikiye Bobi Wine. CPJ iremeza ko abapolisi bakubitaguye aba banyamakuru, babambura ibikoresho byabo by’akazi kandi barabyangiza. Irasaba ko abapolisi babikoze babiryozwa.
Abo banyamakuru, nk’uko CPJ ibivuga, ni James Akena na Alfred Ochwo b’ikigo ntaramakuru cy’Abongereza Reuters, umunyamakuru (CPJ itavuga izina) wa “The Observer” nacyo cyo mu Bwongereza, na Ronald Galiwango na Juma Kirya ba televiziyo NTV yo muri Uganda.
Urukiko rwa gisilikali, rwabanje kuburanisha Depite Bobi Wine kuwa kane, rwamukuyeho icyaha cyo gutunga imbunda atabifitiye uruhushya, ruramurekura. Ariko agisohoka, Bobi Wine yahise na none atabwa muri yombi, noneho n’ubucamanza bwa gisivili. Bwo bumurega kugambanira igihugu.
Facebook Forum