Uko wahagera

Amatora muri Amerika 2020

USA: Reta ya Georgia Yategetse ko Amajwi Yongera Guharurwa

Abaharura amajwi y'itora muri komini ya Fulton mu mujyi wa Atlanta muri reta ya Georgia

Reta ya Georgia yategetse ko amajwi yavuye mu matora ya Prezida yabaye kw'italiki 3 y'uku kwezi kw'icumi na rimwe muri Reta Zunze ubumwe za Amerika asusbira guharurwa.

Umunyamabanga wa Reta ya Georgia, Brad Raffensperger, umurepublikani yabitegetse uno musi ku wa gatatu. Ni inyuma y’uko vyibonekeje ko amajwi yari yegeranye cane hagati ya Prezida Donald Trump, umurepublikani, n’uwatowe kuba prezida, Joe Biden, umudemokrate.

Mu gihe amajwi nka yose amaze guharurwa muri Georgia, Joe Biden ari imbere ya Trump n’amajwi 14112 ku majwi agera ku miliyoni 5 y’abatoye muri iyo reta.

Raffensperger yatangaje ko ashaka ko Prezida Trump atsinda amatora. Yamara yarahakanye ko igikorwa c’uguharura amajwi caranzwe n’utunenge. Reta ya Georgia ntiratora umukandida w’umudemokrate ahiganirwa amabanga y’umukuru w’igihugu kuva mu mwaka w’i 1992.

Raffensperger yahayagije abategetsi bajejwe amatora muri Reta ya Georgia mu kuvuga igikorwa cabo kitoroshe. Yamara avuga ko baranguye amabanga yabo neza. Yamenyesheje ko azotumira indorerezi z’abarepublbikani n’abademeokrate kugira bakwirikirane igikorwa c’ugusubira guharura amajwi kubera bikenewe cane, cane cane muri iki gihe.

Abategetsi bajejwe amatora bizeye ko ico gikorwa kizoba caherahejwe kw’italiki 20 y’uku kwezi kw’icumi na rimwe. Kuri iyo tariki ni bwo leta ya Georgia igomba kwemeza bidasubirwaho amajwi y’abahatoreye yavuye mu matora.

See all News Updates of the Day

Biden Ategekanya Kugena Aba Mbere muri Reta Yiwe kuwa Kabiri

Perezida yatowe Joe Biden ariko ashikiriza ijambo mu gisagara abamwo ca Wilmington, Delaware, kw'italiki ya 19/11/2020.

Uwatowe kuba perezida muri Reta zunze ubumwe za Amerika, Joe Biden, ategekanya kugena aba mbere mubazoba muri reta yiwe kuwa kabiri. Vyashikirijwe n’umwe mu bafasha biwe kuri uyu w’Imana, mu gihe Perezida Donald Trump yasavye abarepublikani kumushigikira mu rugamba arimwo mu butungane aho arondera ko ibiharuro vyavuye mu matora vyohindukirira ku ruhande rwiwe akabandanya atwara.

Ron Klain, uwuzobera Biden umuyobozi w’akazi muri White House, yanse kugaragaza ibigo n’abategetsi bazogenwa kubitwara. Ariko perezida yatowe yavuze mu ndwi iheze ko yamaze guhitamwo umushikiranganji w’ikigega kandi yizera ko aserukira abademokrate bose.

Mu gihe Biden ari mu myiteguro yo kuba umuperezida agira 46 wa Amerika, Trump yaranse kwemera ko yatsinzwe. Kuri uyu w’Imana, uwo mutegetsi yabwiye abayoboke biwe yifashishije urubuga Twitter ko “hazoboneka amajwi menshi cane yibwe”, asaba abarepublikwongereza inguvu mu rugamba.

Ariko urugamba rwiwe mu butungane nta vyamwa ruratanga gushika ubu. Imanza zishika 34 yarazitsinzwe canke arazisokoramwo cane cane mu mareta barwaniramwo amajwi menshi, ayo Biden asa n’uwayatsinze.

Kuva Trump yitwara, nta reta n’imwe ariko araburanamwo arabasha guhinduramwo ibiharuro mu majwi, bituma Biden akiza imbere ku majwi 306 kuri 232 y’intumwa z’abanyagihugu. Niyo majwi arabwa kugira hagaragare uwuba Perezida, atari amajwi rusangi, naho n’aho nyene Biden arusha Trump amajwi arenga imiliyoni 6.

COVID-19: Joe Biden Yizeza Abanyamerika ko Atazobagumiza mu Rugo

Perezida Yatowe Joe Biden i Wilmington, Delaware, Kw'italiki ya 19/19/2020.

Joe Biden yatowe kuba perezida muri Reta zunze ubumwe za Amerika yavuze kuri uyu wa kane ko atazotegeka guhagarika imirimo yose mu gihugu mu ntumbero yo kurwanya ikwirakwira rya Covid-19 naho abandura barushiriza kwiyongera.

Amareta n’ibisagara bitari bike biza vyaramaze gufata izo ngingo, zirimwo Guma mu Rugo, kubuza abarira mu mazu y’uburiro, no kugabanya ibitigiri vy’abemerewe gukoranira hamwe.

Biden yabwiye itangazamakuru ko ataco abona cotuma ahagarika igihugu cose, kuko ata mwimbu vyotanga. Ariko yavuze ko amategeko y’ibihe n’ingene ibikorwa vyo kwugururwa bizofatwa hisunzwe ibice bibangamiwe kuruta ibindi mu gihugu.

Amerika igeze ku bantu barenga 251 000 bamaze kwicwa n’uwo mugera hamwe n’abarenga imiliyoni 11 n’ibihumbi 600 bamaze kwandura nkuko kaminuza Johns Hopkins yo muri Amerika.

Iyongerekana ry’abandura muri Amerika ryatumye ikigo c’Amerika kijejwe gukinga indwara zandukira, CDC, kigabisha abanyamerika bagiye gufata ingendo zo guhimbaza umusi mukuru w’umuganuro wa Thanksgiving.

COVID-19: Abanyamerika Baragabishwa mu Bihe vya Thanksgiving

Inkoko zo mu bwoko bwa Dindot ziribwa ku musi wa Thanksgiving.

Mu gihe ibitigiri vy’abandura COVID-19 birushiriza kwiyongera muri Reta zunze ubumwe za Amerika, ikigo kijejwe gukinga ndwara zandukira, CDC, kiragabisha abanyamerika muri iyi misi mikuru ihereza umwaka yimirije. Iyo misi mikuru irimwo umunsi w’umuganuro, Thanksgiving uzohimbazwa kw’italiki 26 z’ukwezi kwa cumi na kumwe.

Kuri uyo munsi bimenyerewe ko imiryango n’abagenzi bahura bagasangira ibinyobwa n’imfungurwa.

Dr. Henry Walke, ajejwe gukurikiranira hafi ikiza ca COVID-19 mu kigo CDC yavuze ko iki gihe abanyamerika basabwa kwubahiriza ingingo zo kurwanya ikwirakwira ry’uwo mugera.

CDC ihanura abantu guhimbaza uwo musi mukuru n’abo babana mu nzu gusa mu gihe bahisemwo kuwuhimbariza mu rugo.

Thanksgiving ni umwe mu misi abanyamerika bafata ingendo mu gihugu hagati. CDC isaba abafata izo ngenzo kuzifata biyubara ntibandure canke banduze abandi.

USA: Igice c'Abarepublikani Batoye Bemeza ko Trump Yatsinze

Abayoboke ba Trump mu Myiyerekano Washington, D.C.

Amatohoza aheruka gukorwa muri Reta zunze ubumwe za Amerika yerekana ko igice c’abarepublikani batoye bemera ibivugwa na Perezida Donald Trump ko yatsinze amatora biciye mu kuri, aho yahiganwa n’umudemokrate, perezida yatowe Joe Biden.

Trump yamye yemeza, hafi buri musi ko amatora hamwe n’iharura ry’amajwi vyakozwe hatumbereye kumukumira ku butegetsi, aca arahakana kwemera ko yatsinzwe na Biden.

Ivyashikirijwe inyuma yo kubaza no kwumviriza abanyagihugu barenga 1 300, vyasohowe kuri uyu wa gatatu vyerekana ko 73 kw’ijana bemera ko Biden yatsinze, na 5 kw’ijana bibaza ko Trump ari we yatsinze.

Ariko abanywanyi b’umugambwe w’abarepublikani baracafise amakenga kuvyavuye mu matora babajijwe nimba Biden yatsinze biciye mu kuri.

Abarepublikani 52 kw’ijana bavuga ko Trump yatsinze mu kuri mu gihe 29 kw’ijana bemeza ko Biden yatsinze.

Ariko ibinyamakuru vyose bikomeye muri Amerika vyatangaje ko Biden yaronse amajwi arenga 270 ku majwi 538 y’intumwa ziserukira abanyagihugu, ari nazo zidadanura amatora ya perezida muri Amerika. Biden kandi aza imbere mumamiliyoni y’amajwi y’abatoye bose, nkuko vyagendeye umudemokrate Hillary Clinton mu 2016, igihe yatsindwa na Trump mu majwi y’intumwa ziserukira abanyagihugu.

Kuva haba amatora, Trump ntagaragara mu banyagihugu, ariko akunze kwifashisha urubuga Twitter mu kwidoga ko yibwe ikindi kiringo mw’iharurwa ry’amajwi. Ariko yaratsinzwe imanza zitari nke mu masentare kandi nta vyemeza yerekanye ko iharurwa ry’amajwi ryabayemwo ubusuma.

Perezida Trump Yirukanye Uwari Ajejwe Umutekano mu vy'Amatora

Christopher Krebs

Perezida wa Reta Zunze Ubumwe z’Amerika Donald Trump yaraye yirukanye umukuru w’ikigo kijejwe kugenzura no gucungera umutekano w’ubuhinga bwa none mu vy’amatora y’Amerika.

Mu butumwa yacishije ku rubuga rwiwe rwa Twitter, Perezida Trump yagirije Christopher Krebs ko “ yimonogoje mu kuvuga amajambo yuzuye ibinyoma kw’itunganywa ry’amatora”. Muri ubwo butumwa bumenyesha ikomborwa ry’uwo mutegetsi, Trump yashimangiye ko amatora ahitiye aha muri Amerika yaranzwe na twa “sorobo twinshi”.

Ni ivyagiriji Krebs yasezerewe co kimwe n'ikigo, CISA, yaramutswa bamirira kure. Yishura kuri ubwo butumwa bumukombora abicishije kuri Twitter yiwe, Christopher Krebs yavuze ko yishimiye cane akazi k’iteka yakoze neza”. Yanditse ati: “ Gwanira amateka y’uno munsi, uharanire kazoza.”

Ibindi kuri ino nkuru turacabitunganya

Voma ibindi

XS
SM
MD
LG