Uko wahagera

Amatora muri Amerika 2020

USA: Guhiga Bukware Abashyigikiye Trump Bateye Congres y’Amerika

Bamwe mu bakoze igitero kuri Congres y’Amerika

Muri Leta zunze ubumwe z'Amerika, abashinjacyaha baratangaza ko barimo bakurikirana abantu amagana bakekwaho uruhare ku gitero cyo ngoro y'inteko ishinga amategeko mu cyumweru gishize.

Abashinjacyaha bavuga ko bamaze kumenya neza abantu 170, kandi ko biteguye guta muri yombi abandi benshi mu minsi iri imbere. Inzego z'ubutabera zirimo zirakora anketi z'akataraboneka mu gihugu cyose no guhiga bukware abagiye mu gitero.

FBI, urwego rw'ubugenzacyaha rwa Leta zunze ubumwe z'Amerika, ivuga ko yabonye abantu bayiha amakuru barenga ibihumbi ijana. Arimo amafoto, amashusho ya videwo, n'ubutumwa bwatambutse ku mbuga nkoranyambaga.

Mu bamaze gutabwa muri yombi harimo umudepite wo mu nteko ishinga amategeko ya leta ya Virginia y'uburengerazuba iri mu majyepfo ya Leta zunze ubumwe z'Amerika, n'umugabo wo muri leta y'Arkansas, nayo iri mu majyepfo y'igihugu, wifotoje yishyize mu munezero utangaje mu ntebe y'umukuru w'Umutwe w'Abadepite, Nancy Pelosi, yashyize n'ibirenge bye ku meza y'ibiro by'uyu muyobozi.

Abateye Capitol, ingoro y'inteko ishinga amategeko y'Amerika, bashinjwa ibyaha birimo ibyoroheje nko kwinjira ahantu batemerewe, gusahura no kwangiza umutungo wa leta, n'ibindi biremereye birimo gukomeretsa n'ubuhotozi, byo bishobora gutuma bafungwa kugera ku myaka 20.

See all News Updates of the Day

Joe Biden Aratangaza Gahunda yo Guhangana na Covid-19

Joe Biden

Joe Biden watorewe kuba perezida w'Amerika kuri uyu wa kane aratangaza gahunda yo guhangana n'ikiza cya virusi ya Corona. Iyo gahunda irimo kongera inkingo zitangwa no kurwanya ingaruka icyo kiza cyagize ku bukungu.

Biteganijwe ko iyo gahunda ari buze kuyitangaza mu ijambo ari buvuge kuri uyu mugoroba. Yamaze gushyiraho intego yo kuzaba hatanzwe inkingo zigera kuri miliyoni 100 mu misi yambere 100 y'ubutegetsi bwe uhereye ku italiki 20 z'uku kwezi kwa mbere.

Muri gahunda ye, byitezwe ko hashobora kubamo kongera ingengo y'imali yo kwagura gahunda yo gutanga inkingo z'ikiza cya Covid 19. Ubutegetsi bw'Amerika bwemeje ku buryo bw'ingoboka ikoreshwa ry'ubwoko bubiri bw'inkingo butandukanye. Bwombi busaba ko umuntu ahabwa urwo rukingo inshuro ebyiri. Kugeza ubu abantu barenga miliyoni 10 ni bo bamaze guhabwa urukingo rwa mbere.

Gahunda ya Biden yo kurwanya ikiza cya virusi ya Corona kandi yitezwe ko ishobora kubamo indi nkunga y'amafaranga izahabwa imiryango y'abaturage b'Amerika. Iheruka gutangwa yatindijwe nuko habayeho kutumvikana ku byerekeye ingano yayo.

Umujyanama wa Perezida Biden mu byerekeye ubukungu Brian Deese, ku wa gatatu yavuze ko muri gahunda nshya hazaba hakubiyemo n'inkunga ku bakora ubucuruzi buciriritse. Yavuze ko Inteko Ishinga Amategeko izabanza kwita ku gutora ingingo zirebana n'ingamba zo gutanga iyo nkunga nyuma ikareba mu buryo bwagutse ibyo kuzahura ubukungu n'ibyerekeye ubuvuzi n'ibikorwa remezo.

Perezida Trump Arezwe Ubwa Kabiri muri Sena

Umukuru w'inama nshingamateka y'Amerika Nancy Pelosi igihe abashingamateka bemeza ikirego ca Impeachement kuri Perezida Trump. Kw'italiki ya 13-01-2021

Abadepite mu nteko ishinga amategeko y'Amerika bemeje umwanzuro w'ikirego bashaka gushyira kuri Perezida Donald Trump muri Sena, ikirego bita Impeachment mu Cyongereza.

Mbere y'itora, abadepite babanje kujya impaka ndende. Umukuru w'Umutwe w'Abadepite wa Congress, Nancy Pelosi, afungura izo mpaka, yavuze ko "Perezida Trump ari icyago ku buryo budasubirwaho." Ati: "Turabizi twese ko perezida wa Leta zunze ubumwe z'Amerika yashishikarije rubanda kwigomeka ku nzego z'ubutegetsi. Bafashe intwaro bagamije kurwanya igihugu cyacu twese dukunda."

Pelosi, ati: "Abateye Capitol, ingoro y'inteko ishinga amategeko y'Amerika mu cyumweru gishize, si abantu bakunda igihugu. Ahubwo ni abaterabwoba. Amategeko agomba kubahana yihanukiriye. Ibyo bakoze ntibyaturutse mu kirere. Boherejwe na Perezida, abatumye "kurwana bahennye." Pelosi, ati: "Amagambo akora ibara. Ukuri kurahenda. Bagomba kubiryozwa." Yemeza ko Trump yashakaga "kugundira ubutegetsi ku ngufu."

Umuyobozi w'Umutwe w'Abadepite yasabye abadepite kwemeza ikirego kuri Trump, ikirego cyo gushishikariza rubanda kwigomeka ku nzego z'ubutegetsi. Pelosi yasabye Sena, igomba kukiburanisha mu minsi iri imbere, kugihamya Trump.

Abadepite b'Abademokarate bose bafashe ijambo bagushije mu rya Pelosi. Bashimangira ko igitero cyamennye amaraso: cyaguyemo abantu batanu barimo umupolosi umwe mu bashinzwe kurinda Capitol. Abademokarate bavuga kandi ko igitero "cyari kigamije kwica Visi-Perezida wa Repubulika Mike Pence, n'umuyobozi w'Umutwe w'Abadepite Nancy Pelosi," nimero ya kabiri n'iya gatatu mu butegetsi bw'igihugu inyuma ya Perezida Trump. Bose bavuga ko abateye Capitol ari abanzi b'igihugu.

Abadepite b'Abarepubulikani hafi ya bose barwanyije ikirego bivuye inyuma. Bamwe, bati: "Abademokarate batangiye gushaka gukura Perezida Trump ku butegetsi ataranabutangira. Barabigerageje mu mwaka ushize birabananira. None n'ubu dore ibyo barimo!" Abandi Barepubulikani bamaganye ikirego bavuga ko inteko ishinga amategeko itakurikije inzira nyayo. Bayirega ko itakoze anketi, ko itigeze ihamagara abatangabuhamya, kandi ko itahaye uregwa, Perezida Trump, umwanya wo kugira icyo abivugaho.

Buri mudepite yahabwaga umwanya wo gutanga igitekerezo cye nta wundi umuvugiyemo. Bose bari bambaye udupfukamunwa. Bose kandi bahurije ku bintu bibiri: icya mbere, bamaganye bivuye inyuma igitero cyibasiye ingoro yabo, bakomera n'amashyi, bose bahagurutse, abapolisi bakigaragajemo ubutwari. Icya kabiri: nta n'umwe wigeze avuga ko amatora yibwe, nk'uko Perezida Trump ahora abivuga. Ahubwo bose bavuze ko Joe Biden azimikwa uko biteganyijwe kuwa gatatu w'icyumweru gitaha.

Nyuma y'impaka, abadepite bakoze itora, bemeza ikirego n'amajwi 232, arimo icumi y'Abarepubulikani, ku 197 y'abatoye "OYA". Bitandukanye no mu mwaka ushize, ubwo Abarepubulikani bose uko bangana, nta n'umwe uvuyemo, banze kwemeza ibirego by'Abadepite, mu rubanza rwa mbere baburanye na Perezida Trump muri Sena.

Nancy Pelosi ntiyatangaje igihe azagereza ikirego muri Sena.

Perezida Trump abaye perezida wa mbere na mbere mu mateka ya Leta zunze ubumwe z'Amerika inteko ishinga amategeko igiye kuburanisha inshuro ebyiri. Ashigaje icyumweru kimwe kugirango manda ye ibe irangiye. Urubanza rwe muri Sena ruzaba yaravuye ku butegetsi, ariko Sena ntiratangaza igihe urubanza ruzatangirira. Icyaha kiramutse kimuhamye ashobora guhabwa igihano cyo kutazongera burundu kwiyamamariza umwanya uwo ari wose unyura mu matora.

Umuyobozi w'Umutwe w'Abadepite yashyizeho itsinda ry'abadepite icyenda bazaba abashinjacyaha. Bakuriwe n'umunyamategeko Jamie Raskin, umwe mu bahagarariye leta ya Maryland muri Congress.

Abandi ni Diana DeGette wo muri leta ya Colorado, David Cicilline wo muri Rhode Island, Joaquin Castro muri Texas, Eric Swalwell wo muri California, Ted Lieu nawe wo muri California, Joe Neguse wo muri Colorado, Madeleine Dean wo muri Pennsylvania, na Stacey Plaskett uhagarariye ibirwa bya Leta zunze ubumwe z'Amerika byitwa Virgin, biri mu nyanja ya Caraïbes.

Biden Yagenye Samantha Power nk’Umukuru wa USAID

Samantha Power

Perezida Joe Biden yagenye Samantha Power nk’umukuru w’ikigo c’Amerika kijejwe iterambere kw’isi, USAID. Umupfasoni Samantha Power yahoze ari Ambasaderi w’Amerika muri ONU ku ntwaro ya Barack Obama.

Akaramuka yemejwe n’Inama Nkenguzamateka, azoba agiye kungora ico kigo gihabwa amafaranga yo gukoresha agera ku miriyaridi 20 z’amadorali ku mwaka ku mwaka.

Biden yatanganje kandi ko ayo mabanga ya Samantha Power ubu ashizwe ku rwego rw’igisata kijejwe umutekano mu biro vya Presidence y’Amerika. Biden amugena, yashimangiye ko USAID izofasha mu rugamba rwo kurwanya ikiza ca Corona kw’isi mu gushigikira ibihugu bisinzikaye gusumba ibindi.

Biden yavuze ko Samantha Power ari “Intashikirwa mu bikorwa vyiwe”.
Samantha Power yabaye ambasaderi w’Amerika muri ONU kuva mu 2013 gushika mu 2017. Mu 2003, yahawe agashimwe kitwa “Pulitzer” yaronse kubera igitabo yise “A Problem from Hell: America and the Age of Genocide," kigaruka ku ruhara rw’Amerika mu gukumira jenoside mu bihugu bitandukanye

Abademokate Bizeye ko Abadepite Bemeza ko Trump Avanwa ku Butegetsi

Ifoto ya Trump na Pelosi

Abadepite b'inteko ishinga amategeko ya Leta zunze ubumwe z'Amerika - Congress uyu munsi barateganya gutora umwanzuro wemeza ikirego bashaka gushyira kuri Perezida Donald Trump muri Sena, ikirego bita Impeachment mu Cyongereza.

Abademokate bizeye ko abadepite baza kwemeza umwanzuro. Icya mbere: bafite ubwiganze bw'amajwi. Icya kabiri: abadepite benshi b'Abarepubulikani nabo batangaje ko baza kuwutora. Bitandukanye no mu mwaka ushize, ubwo Abarepubulikani bose barwanyije ibirego by'Abadepite, mu rubanza rwa mbere baburanye na Perezida Trump muri Sena.

Abadepite barateganya kurega Perezida Trump icyaha kimwe cyo gushishikariza rubanda kwigomeka ku nzego z'ubutegetsi. Bavuga ko ari inyuma y'igitero abamushyigikiye bakoze, mu cyumeru gishize, ku ngoro y'inteko ishinga amategeko, cyaguyemo abantu batanu.

Umuyobozi w'Umutwe w'Abadepite muri Congress, Nancy Pelosi, aratangaza ko yashyizeho itsinda ry'abadepite icyenda bazaba abashinjacyaha. Bakuriwe n'umunyamategeko Jamie Raskin, umwe mu bahagarariye leta ya Maryland muri Congress.

Donald Trump ashigaje icyumweru kimwe gusa kugirango manda ye ibe irangiye. Urubanza rwe muri Sena ruzaba yaravuye ku butegetsi. Icyaha kiramutse kimuhamye ashobora guhabwa igihano cyo kutazongera burundu kwiyamamariza umwanya uwo ari wose unyura mu matora. Agiye kuba perezida wa mbere mu mateka ya Leta zunze ubumwe z'Amerika inteko ishinga amategeko igiye kuburanisha inshuro ebyiri.

Iki kirego cy'Umutwe w'Abadepite gikurikiye irindi geregaza ryo gukura Perezida Trump ku butegetsi ryaraye ryanze. Mu ijoro ryakeye, abadepite bemeje, n'amajwi 223 kuri 205, umwanzuro usaba Visi-Perezida wa Repubulika, Mike Pence, gukoresha ivugurura ry'itegeko nshinga rya 25, riteganya ko we n'ubwiganze bw'inama y'abaminisitiri bashobora kwemeza ko umukuru w'igihugu atagishoboye gutegeka, bityo bakamukuraho.

Uyu mwanzuro ntiwari itegeko. Mike Pence yandikiye Nancy Pelosi ko adashaka kuwukurikiza. Ni bwo abadepite bafashe inzira ya “Impeachment”.

Voma ibindi

XS
SM
MD
LG