Muri Repubulika iharanira demokarasi ya Kongo, polisi yakoresheje amasasu y’intambara mu mujyi wa Beni, mu ntara ya Kivu ya Ruguru, irasa mu baturage bari mu myigaragambyo yo kwamagana icyemezo cyo gusubika amatora.
Kugeza ubu nta nkuru ivuga niba hari abapfuye cyangwa abakomeretse.
Usibye i Beni, imyigaragambyo yabaye no mu mujyi wa Goma. Yiganje cyane cyane muri quartier yitwa Majengo ituwe ahananini n’abantu bakomoka Beni na Butembo.
Abanyeshuri ba kaminuza ya Goma na bo bakoze imyigaragambyo.
Muri iyi myigaragambyo, polisi yataye muri yombi abantu bataramenyekana umubare.
Komisiyo y’igihugu ishinzwe amatora, CENI, yatangaje ejo ko amatora, aho kuba ejobundi ku cyumweru nk’ahandi hose mu gihugu, yimuriwe mu kwezi kwa gatatu k’umwaka utaha wa 2019.
Izo ntara zasubitswemo amatora Beni, Butembo, Yumbi, no mu nkengero z’ahantu hose hari icyorezo cya Ebola. Icyorezo kimaze guhitana abantu barenga 350. Indi mpamvu y’isubikwa ry’ayo matora CENI itanga, ni umutekano muke.
Facebook Forum