Sosiyete y'indege y'u Rwanda itwara abantu n'ibintu, Rwandair, yabaye ihagaritse by'agateganyo ingendo yakoreraga mu gihugu cy'Ubushinwa mu mujyi wa Guangzhou kubera virus ya Corona ikomeje gukwiragitra hirya no hino kw'isi.
Mu itangazo Rwandair yashyize ahabona irasobanura ko yashingiye ku byatangajwe n'ishami ry'umuryango w'abibumbye ryita ku buzima OMS ku cyorezo cya Corona gikomeje guhangayikisha abatari bake.
Rwandair iravuga ko izongera kugira icyo ivuga ku cyemezo cyayo mu kwezi kwa kabiri. Iravuga ko ku bagenzi bari barangije kugura amatike bashobora gutegereza cyangwa se ababishaka bagasubizwa amafaranga.
Ikigo cy'igihugu gishinzwe indege za gisivili, Rwanda Civil Aviation Authority, na cyo kiramenyesha ko abandi bagenzi bo mu zindi ndege zinjiye ku kibuga mpuzamahanga cya Kigali bavuye mu Bushinwa bahita bapimwa kugira ngo harebwe niba ntawanduye Corona Virus.
Uretse iri tangazo ryagiye ahabona kuri uyu wa gatanu, umukozi ushinzwe itangazamakuru n'itumanaho muri Rwandair yabwiye Ijwi ry'Amerika ko hataragera ko bavugira mu itangazamakuru iby'iki cyemezo ko bagomba kubanza bakareba iyo byerekeza.
Ibi bibaye mu gihe mu minsi ishize leta y'u Rwanda yaburiye Abanyarwanda ibasaba kutajya mu mujyi wa Wuhan wo mu Bushinwa wagaragayemo bwa mbere iyo Virus. Rwandair ibaye isubitse ingendo by'agateganyo ikurikiye Sosiyete y'indege ya Kenya Airways na yo yasubitse ingendo zo mu gihugu cy'Ubushinwa.
Leta y'u Rwanda imaze gutangaza ko nta gahunda yo gutahura Abanyarwanda bari mu Bushinwa nkuko bimwe mu bihugu vyatanguye kubikora. Icyorezo cya Corona Virus kimaze guhitana abasaga 100 mu gihe abandi babarirwa mu 5000 byamaze kwemezwa ko bacyanduye.
Facebook Forum