Ishirahamwe rihurikiyemwo ibihugu bigize umuryango w'Ubumwe bwa Buraya na Reta zunze ubumwe z'Amerika bitangaza ko biri mu nzira zo kunagura imigenderanire na Etiyopiya.
Joseph Borrell, aramutswa igisata kijejwe imigenderanire y’Ubumwe bwa Buraya n’ayandi makungu, yasiguye ko Ubumwe bwa Buraya n’Amerika bibwirizwa gusuzuma vyitonze ishirwa mu ngiro ry’amasezerano y’amahoro muri Etiyopiya.
Uwo mutegetsi yabwiye Etiyopiya n’Abanyetigreya ko imigenderanire izonaguka bukebuke, intambwe zose z’amahoro zigasuzumwa mu bwitonzi. Mu kurindira ko imigenderanire inaguka Amerika n’Ubumwe bwa Buraya bemeye kuba hafi y’Abanyetigreya na Etiyopiya, mu ntumbero yo gushikana amasezerano y’amahoro hagati y’izo mpande.
Amasezerano y’amahoro hagati ya Etiyopiya n’abategetsi bo mu ntara ya Tigreya yashizweko umukono igenekerezo rya 2, ukwezi kwa cumi na rimwe ko mu 2022. Ayo masezerano yabonetse inyuma y’imyaka irenga ibiri ingabo za Etiyopiya zitana mu mitwe n’iza Tigreya.
Amerika ivuga ko iyo ntambara yahitanye abagera ku bihumbi 500. Mu matohoza yaryo, ishirahamwe mpuzamakungu ONU rikemeza ko impande zose zakoze ivyaha vyo mu ntambara. (AFP)
Facebook Forum