Uko wahagera

Gambiya: Perezida Adama Barrow Yiteguye Gutahuka


Adama Barrow yarahiye ari muri Ambasade ya Gambiya muri Senegali tariki ya 18 y'ukwezi kwa mbere 2017

Perezida uherutse gutorwa muri Gambiya Adama Barrow yatangaje ko yiteguye kuva muri Senegali, aho yari yarahunguye, agasubira mu gihugu ke. Ku rubuga rwe rwa Twitter, bwana Barrow kuri uyu wa gatandatu yanditseho ko azasubira muri Gambiya gusimbura Yahya Jammey umaze kwemera ko yatsinzwe kandi ko azava mu gihugu.

Jammey, wemeye gufata ubuhungiro muri Gineya, yiyemeje gushyikiriza ubutegetsi Barrow mu mahoro. Kuba Jammey azava muri Gambiya, bizaba birangije uruhagarara rwa politiki rwari rugiye gutuma ingabo z'umuryango wa CEDEAO w'Afurika y'uburengerazuba zijya kumukuraho ku ngufu.

Yahya Jammey yari amaze imyaka 22 ku butegetsi yafashe akoze kudeta muri Gambiya. Ubutegetsi bwe bw'igitugu bwaranzwe n'ibikorwa byo kugaraguza abantu agati no kwica uketswe wese kuba atavuga rumwe na we muri politiki.

Yahya Jammey yemeye guhunga amaze kubyumvikanaho na ba perezida ba Gineya na Moritaniya. Abakurikiranye hafi ibiganiro abo bayobozi bagiranye kuwa gatanu, bemeza ko bumvikanye aho bwana Jammey azatura ndetse no kuba azahabwa imbabazi ku byaha bivugwa ko yakoze mu myaka yamaze ku butegetsi.

XS
SM
MD
LG