Perezida Donald Trump wa Leta zunze ubumwe z'Amerika yasabye Abanyamerika kudatinya indwara ya Covid-19. Yasubiye iwe ejo ku mugoroba avuye mu bitaro yari amazemo amasaha 72 abaganga bamuvura Virusi ya Corona.
Mu gikorwa kigamije kugaragaza ko ubuzima bwe bumeze neza, Perezida Trump yazamutse ingazi zijya ku ibaraza ry'igorofa ya kabiri y'ingoro y'umukuru w'igihugu. Yahagaze kuri iryo baraza yiyambura agapfukamunwa azamura ibikumwe byombi yerekeza kuri kajugujugu ya gisirikare yamuzanye yari igiye guhaguruka isubirayo. Nyuma yamanutse yerekeza aho bari bamutegereje, na none, atambaye agapfukamunwa.
Mbere asohoka muri Kajugujugu yari imuvanye mu bitaro, yahindukiye areba muri za kamera z'abanyamakuru, na none azamura ibikumwe byombi. Ubwo ni bwo Ijwi ry'Amerika ryamubajije uko yumva ameze, yumvikanira kure avuga ati: "meze neza".
Nyuma ku mugoroba yaje kohereza ijwi ku rubuga rwa Twitter avuga ku kiza cya Covid-19 agira ati: "Ntikibaganze, ntikibatere ubwoba. Tugiye gusubira yo, tugiye gusubira ku mirimo twemye. Ntimureke gipfukirana ubuzima bwanyu, ariko mwitonde".
Abashinzwe kwamamaza Perezida Trump uhagarariye ishyaka ry'Abarepubulikani mu matora yo mu kwa cumi na kumwe bavuze ko yitegura ikiganiro mpaka cya kabiri taliki 15 z'ukwa cumi. Kugeza ubu ibipimo bibanziriza amatora byerekana ko aza inyuma y’uwo bahanganye, Joe Biden wo mu ishyaka ry'Abademokrate.
Facebook Forum