Perezida Donald Trump wa Leta zunze ubumwe z'Amerika n'umufashe we Melania Trump banduye virusi ya corona.
Iyo nkuru yatangajwe bwa mbere na Perezida Trump ubwe ku rubuga rwe Twitter mu rukerera rwo kuri uyu wa gatanu. Yagize ati "Ndabamenyesha ko muri iri joro jyewe n'umufasha wanjye ibipimo byagaragaje ko twanduye COVID-19. Tugiye gufata akanya twishyire mu kato ."
Nyuma y'iminota mike, ibiro by'umukuru w'igihugu byahise bisohora itangazo ryemeza ayo makuru. Muganga Sean Conley, wemeje ayo makuru yavuze ko Perezida Trump n'umufashe we bakomeye kandi ko azakomeza kubahiriza inshingano ze nk'umukuru w'igihugu.
Ibikorwa byo kwiyamamariza manda ya kabiri bye byari biteganijwe muri iyi minsi byose byahise bihagarikwa.
Amakuru yuko Perezida Trump yanduye virusi ya corona yabanjirijwe n'ayandi yavugaga ko umwe mu bajyanama be ba hafi, Hope Hicks, yanduye virusi ya corona ko kandi ashobora kuba arembye.
Perezida Trump w'imyaka 74 ari mu kigero cy'abantu bibasirwa n'iyo virusi. Ariko abakurikiranira hafi ubuzima bwe bavuga ko asanganywe ubuzima bwiza.
Perezida Trump yumvikanye kenshi asa nk'usuzugura iyo virusi imaze kwandurwa n'Abanyamerika barenga miliyoni indwi. Abarenga 207,000 imaze kubahitana.
Facebook Forum