Minisiteri y'ubuzima muri Kenya yategetse ko abantu bose bagomba kugaragaza icyemezo ko bakingiwe Covid-19 kugirango bashobore kwinjira mu modoka zitwara abagenzi cyangwa mu biro bya leta.
Iki cyemezo gifashwe nyuma yuko bigaragaye ko umubare w’abandura Covid-19 ukomeje kwiyongera. Inzego z’ubuzima zigaragaza ko abandura bavuye kuri rimwe ku ijana bakaba bageze kuri 30 ku ijana.
Mu gihe kitarenze amasaha 24, abantu 3.328 ku 11.200 bapimwe basanganywe Covid-19.
Mu ntangiriro z’uku kwezi Kenya yari yatangaje ko igiye gukaza ingamba ku bantu batarikingiza, ariko urukiko mu mujyi wa Nairobi ruza gutegeka ko izo ngamba zitakurikije amategeko ubwo umucuruzi yaruregeye avuga ko izo ngamba zirimo guhatira abaturage gukora ibyo badashaka.
Umuyobozi mukuru muri ministeri y’ubuzima, Mercy Mwangangi, yavuze kuri uyu wa gatatu ko ingamba ku bantu batarikingiza zatangiye kubahirizwa guhera kuri uyu wa gatatu.
Izo ngamba zitegeka ko abantu bose bagomba kugaragaza ko bakingiwe kugirango bemererwe kwinjira ahantu hatandukanye harimo za parike, amahoteli, inzu z’uburiro n’ububari, no mu modoka zitwara abagenzi.
Kuva virusi ya Corona yaduka, Kenya ivuga ko abantu 270,000 bamaze kuyandura. Kenya yiyongereye ku mubare w’ibindi bihugu ku mugabane w’Afurika bimaze iminsi bifata ingamba zikaze zo guhangana na Covid-19.
Birimo Uganda yategetse ko nta muntu uzemererwa ku mashuli atikingije. U Rwanda narwo rwafashe ingamba zirimo kongera iminsi abantu basura igihugu bagomba kumara mu kato.
Facebook Forum