Uko wahagera

COVID-19: Abayobozi b'Akarere ka Rubavu mu Rwanda mu Kato


Ahakorera Akarere ka Rubavu

Abayobozi b'akarere ka Rubavu basabwe kwishyira mu kato nyuma y'uko bahuye n'umuntu wanduye virusi ya Corona. Abo bayobozi barimo umukuru w'akarere ka Rubavu n'abamwungirije bombi, ni ukuvuga ushinzwe iterambera ry'ubukungu n'ushinzwe imibereho myiza y'abaturage, umuyobozi ushinzwe imirimo rusange mu karere, umujyanama wa Komite Nyobozi y'akarere kimwe n’umunyamabanga w’umuyobozi w’akarere.

Amakuru dukesha abashinzwe kurwanya virusi ya Corona muri aka karere avuga ko aba bayobozi n'abakozi b'akarere basabwe kuba bari ahantu ha bonyine nyuma y'uko bahuye n’umuntu waje kugaragara ko yanduye virusi ya corona. Ako kato bakarimo mu gihe hategerejwe ibisubizo by'ibizamini by'ibanze babafashe.

Umwe mu bakozi b'ikigo gishinzwe ubuzima mu Rwanda urimo gukorana n'akarere mu kurwanya virusi ya Corona avuga ko uwo ari umukozi w'ikigo cy'igihugu gishinzwe indangamuntu wari waje guhugura bamwe mu bakozi bashinzwe kwandika, kubika no gucunga amakuru. Ni muri gahunda yo kwandikira ku bitaro abana bavuka no kwandukura abapfuye, ubusanzwe byakorerwaga ku biro by'imirenge.

Aba bahugurwaga kimwe n'abayobozi n'abakozi b'akarere basabwe kutagira abandi begera mu gihe ibisubizo bitarerekana mu buryo ntakuka ko batanduye virusi ya Corona. Abashinzwe kurwanya virusi ya Corona muri aka karere bavuga ko ibipimo bya mbere byahise bifatwa, bakazongera gupimwa ku munsi wa 6 ari na byo bipimo bizatanga amakuru nyayo y'uko haba harimo abanduye canke ntabanduye iyi virusi.

Hagati aho kuva ku itariki 28 z'ukwezi gushize kwa 7, ubuyobozi bw'akarere ka Musanze bwo bwahagaritse kwakira abaturage no kwakira inyandiko zishyikirizwa akarere; butanga umurongo wa telefoni utishyuzwa abaturage bakwifashisha bageza ku karere ibibazo bafite canke bakabigaragaza binyuze mu buryo bw'ikoranabuhanga.

Ubuyobozi bw'aka karere buvuga ko biri mu rwego rwo kubahiriza ingamba n'amabwiriza byo kwirinda ikwirakwira rya virusi ya Corona. Madame Jeanine Nuwumuremyi uyobora aka karere, anasobanura ko ari mu buryo bwo kumenyereza abaturage gukoresha ikoranabuhanga aho bishoboka hose.

Ubuyobozi bw'akarere ka Musanze buvuga ko hataragaragara abinubira ubu buryo canke ngo batinde guhabwa serivisi. Buvuga ko hari abahamagara bakabayobora aho ikibazo cyabo cyakemukira haba ku rwego rw'akagari canke urw'umurenge, aho bisaba umukozi ku rwego rw'akarere agasanga umuturage ufite ikibazo aho ari.

Ubuyobozi bw'akarere ka Musanze buvuga ko ku itariki 27 z'ukwezi gushize ari bwo muri aka karere hagaragaye umuntu 1 wanduye virusi ya corona kandi ko ari n'uwo uheruka kuhagaragara. Ni mu gihe mu karere ka Rubavu ho hamaze kugaragara abanduye iyi virusi bagera mu 100.

Twagerageje kubaza ubuyobozi bw'akarere ka Rubavu niba hari uburyo bwagenwe buza gutuma abaturage bakomeza kubona serivisi bitagoranye muri iki gihe abayobozi bakuru b'akarere basabwe kuba bari ahabonyine , ariko nta gisubizo twabonye. Ari umuyobozi w'akarere n'abamwungirije nta n'umwe wigeze yitaba telefoni canke ngo asubize ubutumwa Ijwi ry'Amerika bwamurungikiye.

Umviriza Ibindi kuri ino nkuru yateguwe n'Umunyamakuru w'Ijwi ry'Amerika mu Rwanda Claude Ganza Munyamagana.

Abayobozi bo mu Karere Ka Rubavu Bashyizwe mu Kato ni Bande?
please wait

No media source currently available

0:00 0:03:38 0:00


Facebook Forum

XS
SM
MD
LG