Leta y’u Rwanda irishimira ko nyuma y’amezi abiri ashize umurwayi wa mbere wanduye Covid-19 agaragaye mu gihugu, kugeza ubu iyi ndwara ntawe irahitana.
Imibare igaragaza ko ahubwo abakize barimo kwiyongera kuruta abakirwaye. Hari ku itariki ya 14/3 ubwo umurwayi wambere yagaragaraga mu gihugu.
Uko iminsi yagiye ikurikirana ni nako umubare w’abarwayi wagiye wiyongera. Kugeza ubu, inzego zishinzwe ubuzima mu Rwanda, zibarura ko abanduye iki cyorezo bamaze kugera kuri 287, imibare yatanzwe ku mugoroba wo kuri uyu wa kane.
Nubwo abanduye iki cyorezo ari benshi, ni nako imibare y'abagenda bagikira igenda irushaho kuzamuka. Imibare yaraye itangajwe na Ministeri y’ubuzima, igaragaza ko abagera ku 168 ari bo bamaze gukira iki cyorezo bakaba barasubiye mu miryango yabo, mu gihe abakirwaye bo bagera kugeza ku 119.
Nubwo habonetse abarwayi batari bake, ariko Inzego zishinzwe ubuzima mu Rwanda, zigaragaza ko nta murwayi numwe urahitanwa n’iki cyorezo.
Inzego z’ubuzima zikangurira abaturage ko mu gihe bumvise ibimenyetso bidasanzwe nko kugira umuriro ukabije, inkorora idasanzwe, gucika intege no guhumeka nabi, bakwihutira kugana abaganga batarazahazwa n’iyi ndwara.
Madame Uwizeye Vivine uzwi ku izina rya Miss Vivy kubera umubyibuho afite, ni umwe mu bantu bavuzwe cyane mu bitangazamakuru ko yanduye Virusi ya Corona, ndetse benshi mu bihe bishize batangira kuvuga ko yamuhitanye.
Aganira n’Ijwi ry’Amerika yavuze ko ari mu bantu bakize Covid 19 ariko bari bamaze kuzahara, kubera ko yabanje kwivuza aziko arwaye inkorora isanzwe.
Uyu mubyeyi benshi bazi nka Miss Vivy, kubera ko ajya agaragara mu birori byo kwiyereka by’abantu banini cyane, agira inama Abanyarwanda yo gukomeza kwirinda iki cyorezo, kuko kenshi uwanduye atamenya uho yahuriye n’umurwayi.
Kugeza ubu imibare itangwa na Ministeri y’ubuzima irerekana ko umubare munini ugaragara muri iki gihe ari uwabagenda bakira iki cyorezo, ariko inzego z’ubuzima zigasaba abakize ko badakwiye kwirara, kuko bashobora kwandura mu gihe bahura n’ufite iki cyorezo.
Ishami ry’Umuryango w’Abibumbye ryita ku Buzima (OMS) ryemeje ku wa 11/3/ 2020 ko Covid-19ari icyorezo cyugarije Isi bitewe n’ubwiyongere bw’abayandura.
Inkuru yateguwe na mugenzi wacu Assumpta Kaboyi
Facebook Forum