Afurika y’Epfo yatangaje ko abantu banduye Covid 19 badafite ibimenyetso batagikeneye kwishyira mu kato. Abafite ibimenyetso bo bazajya bamara iminsi irindwi gusa, mu kato aho kuba 10.
Ibi biri mu itanganzo ryaraye risohowe na guverinoma, nyuma y’inama y’abaministiri yateranye kuri uyu wa mbere.
Leta ivuga ko iki ari ikimenyetso cy’uko umubare w’abandura Covid 19 ukomeje kugabanuka cyane mu gihugu. Ikindi leta ivuga iheraho nuko abantu benshi bamaze gufata inkingo bituma abarwara bataremba cyangwa ngo bajyanywe mu bitaro.
Iri tanganzo ryashyizweho umukono na ministiri mu biro by’umukuru w’igihugu Modli Gungubele rivuga ko ari ubwa mbere umubare w’abandura ujya hasi cyane kuva Covid 19 yaduka mu gihugu.
Ibindi byemezo byafatiwe muri iyo nama y’abaminisitiri birimo ko abanyeshuli bose basubira mu mashuli, ariko hagakurikizwa amabwiriza yo kwirinda Covid 19.
Afurika y’Epfo ni yo iza ku mwanya wa mbere w’ibihugu bifite abaturage benshi bapfuye bazize Covid 19. Abantu 95.000 ni bo bamaze gupfa banduye icyo cyorezo. Abandi miliyoni 3.6 barayanduye.
Facebook Forum