Kenya na Somaliya bafashe icyemezo cyo gufungura imipaka yabo y'ubutaka yari imaze imyaka irenga icumi ifunze.
Kenya yafunze imipaka yayo na Somaliya mu kwezi kwa 11 mu 2011 kubera ibitero bya al-Shabab yagabaga ku butaka bwayo. Uyu munsi, nyuma y’inama y’ibihugu byombi ku rwego rw’abaminisitiri bashinzwe ubutwererane, ubuhahirane, n’umutekano yabereye i Nairobi, minisitiri w’ubutegetsi bw’igihugu wa Kenya, Kithure Kindiki, yatangaje ko imipaka izafungurwa ahantu hatatu mu bihe bitandukanye muri aya mezi atatu ari imbere.
Aha mbere hazafungura muri iyi minsi 30 ni umupaka Mandera-Bulahawa. Mu minsi 60 hazakurikiraho uwa Liboi-Harhar ku ruhande rwa Wajir muri Kenya. Uwa gatatu wa Kiunga-Ras Kamboni winjira muri Lamu muri Kenya uzafungura ku itariki ya mbere y’ukwa karindwi gutaha.
Kenya na Somaliya basangiye umupaka w’ubutaka wa kilometero 680. Basangiye n’uw’amazi y’Inyanja y’Abahinde. Wo, ntibawumvikanaho kubera ubukungu bwa peteroli na gaze urimo. Mu 2021, urukiko rw’Umuryango w’Abibumbye rwavuze ko ahanini muri ako gace bapfa ari aha Somaliya, ariko Kenya yanze kubyemera. (AFP)
Facebook Forum