Muri Leta zunze ubumwe z'Amerika, urubanza rwa Donald Trump muri Sena rwinjiye mu mizi yarwo kuri uyu wa gatatu. Abadepite b'abashinjacyaha ni bo batangiye kwerekana ibimenyetso byabo ku cyaha cyo gushishikariza abayoboke be kwigomeka ku nzego z'ubutegetsi.
Abashinjacyaha bagerageje kumvisha Sena ko amagambo ya Trump yabanjirije igitero cy'abayoboke be kuri Capitol, ingoro y'inteko ishinga amategeko, ataturutse mu kirere ahubwo ko yinjira mu bintu byari bimaze igihe. Berekanye amashusho ya videwo menshi ya disikuru Trump yagiye avuga, ibiganiro yagiranye n'ibitangazamakuru, n'ubutumwa yanyuzaga buri munsi ku mbuga nkoranyambaga Twitter yemeza ko amatora arimo ubujura kuva ataranaba, kandi ahamagararira buri munsi abayoboke be kubirwanya, no gutera Capitol ku italiki ya 6 y'ukwezi kwa mbere gushize.
Abashinjacyaha bemeza ko Trump yirengagije inshingano ze z'umukuru w'igihugu, atatira indahiro ye yo kurengera no kubungabunga itegeko nshinga, ahitamo kuba umutware w'abashaka kwibasira inzego z'ubutegetsi. Bati: "Kandi koko baramwumviye, batera bavuga ko barimo bakora ibyo yabatumye. Yari yarabashyuhije imitwe kenshi ababwira ko ari intambara."
Amashusho menshi abashinjacyaha berekanye yari agiye ku karubanda bwa mbere. Aturuka ahanini ku byuma bifata amashusho y'umutekano w'ingoro ya Congress. Arimo n'ayerekana ukuntu abateye bibasiye abapolisi barinda Capitol, n'ukuntu abadepite, abasenateri n'abakozi b'inteko ishinga amategeko bagiye mu bwihisho igitaraganya mu gihe cy'igitero.
Mu bayoboke ba Trump bateye Capitol, abashinjacyaha bavugamo n'imitwe, nk'uwitwa "Proud Boys," FBI, urwego rw'ubugenzacyaha rwa Leta zunze ubumwe z'Amerika, yashyize ku rutonde rw'imitwe y'iterabwoba ry'imbere mu gihugu. Abashinjacyaha barega Trump ko yari azi neza ko abayoboke be bari bariteguye neza, bafite intwaro z'intambara n'amasasu menshi, n'ibindi bikoresho birimo iby'itumanaho rya gisilikali. Bati: "Yari azi neza kandi yarateguye ko bazatera "nk'umutwe w'ingabo" "cavalery" mu Cyongereza, "cavalerie" mu Gifaransa."
Abashinjacyaha bemeza ko igihe igitero cyarimo kiba kuri Capitol, abategetsi n'abandi bantu banyuranye benshi basabye Perezida Trump kugihagarika no kohereza abasilikali bo kurinda Capitol, "byose arabyanga, ahubwo akora ibirori." Bavuga ko abateye bari bafite umugambi wo kwica by'umwihariko Visi-Perezida Mike Pence, umuyobozi w'Umutwe w'Abadepite Nancy Pelosi, ari bo nimero ya kabiri n'iya gatatu mu butegetsi bwa Repubulika inyuma y'umukuru w'igihugu. Umupolisi umwe yishwe n'abateye. Abandi bapolisi 140 barakomeretse, nk'uko abashinjacyaha babigaraza.
Mu magambo make, abashinjacyaha bagerageje kumvisha abasenateri bazaca urubanza ko "nabo ubwabo bazi neza" ko bari mu mazi abira mu gihe cy'igitero cyo kuri Capitol. Bemeza ko abasenateri, abadepite, n'abakozi benshi b'inteko ishinga amategeko banditse ubutumwa cyangwa bahamagara kuri telefoni imiryango yabo bucece bongorera basa n'ababasezeraho.
Uyu wa kane ni umunsi wa nyuma abadepite b'abashinjacyaha bakomerezaho kwerekana ibimenyetso byabo, bagerageza kwerekana ko Trump ari we nyirabayazana w'igitero kuri Capitol, ingoro y'inteko ishinga amategeko ya Leta zunze ubumwe z'Amerika.
Facebook Forum