Perezida wa Leta zunze Ubumwe z'Amerika, Joe Biden, kuri uyu wa kabiri aratangaza ingamba nshya zo kurwanya ikiza cya Covid 19 mu gihe virusi y'iyo ndwara yo mu bwoko bwa Omicron ikomeje kongera imibare y'abandura muri Amerika.
Imibare y'abandura virusi ya Corona kubera ubu bwoko bwa virusi ya Omicron imaze kwikuba kabiri ugereranije n'uko yari imeze mu mezi abiri ashize. Bitatu bya kane by'abandura basanganwa virusi yo muri ubu bwoko.
Ijambo rya Perezida Biden rigamije gushimangira akamaro k'urukingo rwa Covid-19 no kugaragaza ingamba leta ye ifite zo kurwanya iki cyorezo.
Prezidansi y'Amerika yavuze ko Perezida Joe Biden atangaza ishyirwaho ry'ahantu hashya ho gufatira inkingo n'aho kwisuzumishiriza mu bice bitandukanye by'igihugu, ndetse na gahunda yo gukwirakwiza mu baturage ibikoresho byo kwipimira iyo virusi mu rugo bigera kuri miliyoni 500. Ibyo bizatangira uhereye mu kwezi gutaha.
Mu ngamba nshya harimo gufasha abarwayi ba Covid-19 guteganya ibikoresho byifashishwa mu guhumeka, udupfukamunwa, n'ibyambarwa ku ntoki n'ahandi, mu rwego rwo kurinda abakozi b'inzego z'ubuzima kwandura. Leta kandi izohereza abakozi mu by'ubuvuzi ba gisirikare bagera ku 1.000 hirya no hino mu mavuriro atandukanye nk’uko Prezidansi y'Amerika ibitangaza.
Facebook Forum