Uko wahagera

Pakistani: Nawaz Wigeze Kuba Minisitiri w’Intebe Azafungwa Kubera Ruswa


Nawaz Sharif igihe yarekurwa mu kwezi kwa cenda uno mwaka inyuma y'umwanya muto yamaze afunzwe

Muri Pakistani urukiko rwakatiye Nawaz Sharif wigeze kuba minisitiri w’intebe gufungwa imyaka irindwi rumaze kumuhamya ibyaha bya ruswa.

Urukiko rwavuze ko afite umutungo atabashije kwerekana aho waturutse mu gihe yari ku butegetsi. Uretse igihano cyo kumufunga imyaka irindwi, rwamuciye n’ihazabu y’amadolari miliyoni 25. Rwategetse kandi ko adashobora gukora politiki mu gihe cy’imyaka icumi.

Nawaz Sharif yaburanye ahakana ibyaha. Ishyaka rye, Ligue Nusulmane du Pakistan – Nawaz, ryatangaje ko azajurira. Abayoboke baryo benshi cyane bari baje kumushyigikira ku rukiko. Bashyamiranye akanya gato na polisi, ariko ntawakomeretse.

Nawaz Sharif afite imyaka 68 y’amavuko. Yabaye minisitiri w’intebe inshuro eshatu zitandukanye, bwa mbere kuva mu 1990 kugera mu 1993, ubwa kabili kuva mu 1997 kugera mu 1999, ubwa gatatu kuva mu 2013 kugera mu 2017. Urukiko rw’ikirenga rwamukuye ku butegetsi mu kwezi kwa 7 mu 2017 nabwo aregwa ruswa.

Mu kwezi kwa kilindwi gushize yakatiwe gufungwa imyaka 11 amaze guhamwa n’ibindi byaha bya ruswa. Mu kwezi kwa cyenda gushize, yafunguwe by’agateganyo, atanze ingwate, mu gihe yari agitegereje icyemezo cy’urukiko rw’ubujurire kuri kiriya gihano cye cya mbere. Uyu munsi, yahise atabwa muri yombi asubira muri gereza. Ubu rero afite imyaka 18 mu gifungo.

Ibi bibazo bye, we n’abana be batatu n’umukwe we, byatangiye mu 2015 ikiswe “Panama Papers” kimaze gutangaza imitungo yabo idasobanura inkomoko yayo.

Facebook Forum

XS
SM
MD
LG