Umukozi wo mu nzego z'ubuvuzi muri Repubulika ya demokarasi ya Kongo yahamije kuri uyu wa kane ko uwo muntu wa kabiri arwaye Ebola, hadashize n’icyumweru umwana w’umuhungu w'imyaka itatu apfuye. Byabyukije ubwoba bw’ikindi cyorezo gikomeye.
Abategetsi mu mujyi wa Beni babonye uwo murwayi ejo kuwa gatatu, umunsi nyirizina abaganga batangiriyeho gahunda yo gukingira indwara ya Ebola. Umutegetsi muri uwo mujyi, Michel Tosalinasa, yabibwiye itangazamakuru ryo mu karere.
Ishami rya ONU ryita ku buzima, OMS, ryavuze ko abantu batatu bari batuye mu gace kamwe bapfuye mu kwezi kwa cyenda nyuma yo kugira ibimenyetso bisa n’ibya Ebola. Ibyo birimo kuruka cyane, kuva amaraso no guhitwa.
Beni yabaye indiri y’icyorezo cya Ebola muri 2018-2020 ubwo yahitanye abantu barenga 2200, abandi barenga 1000 bakandura. Iyo virusi yica, yari yacitse mu kwezi kwa gatanu imaze guhitana abantu batandatu.
Abayobozi bashinzwe ubuzima bavuga ko bitari byasobanuka niba abantu baherutse kubonekaho indwara ya Ebola hari aho baba bahuriye n’icyorezo cyabanje.
Facebook Forum