Indwara ya Ebola yongeye kugaragara mu burasirazuba bwa Repubulika ya Demokarasi ya Kongo. Ayo makuru yemejwe na raporo yavuye muri laboratwali nkuru y'igihugu ejo ku wa gatanu.
Iyo raporo ivuga ko umwana w'imyaka 2 mu mujyi wa Beni ari we wasanganywe ubwandu bwa Ebola. Ivuga ko mu kwezi gushize, abaturanyi batatu b'uyu mwana bagaragaje ibimenyetso bisa n'ibya Ebola nyuma bagahita bitaba Imana ariko batigeze bapimwa.
Ministri w'ubuzima muri Kongo yirinze kwemeza aya makuru ariko avuga ko bari busohore inyandiko ibivugaho.
Ntibyahise bimenyekana niba iki kibazo cyagaragaye gifitanye isano n'ibyahabaye hagati ya 2018 na 2020 igihe iyi ndwara yahitanaga abantu 2200 mu burasirazuba bwa Kongo. Yaje kongera kugaragara muri ako gace uyu mwaka ihitana abantu 6. Ubu hari hashize amezi atanu itagaragara muri aka gace k'igihugu.
Iyi ndwara yagaragaye bwa mbere muri Kongo hafi y'umugezi wa Ebola mu 1976. Imaze kwaduka yikubiranya inshuro 11 zose.
Iterwa na virusi yandurira mu guhuza amaraso cyangwa andi matembabuzi y'umubiri. Bimwe mu bimenyetso by'uwanduye harimo guhitwa no kuruka bikomeye.
Abahanga bavuga ko uduce twa virusi itera Ebola dushobora kuguma mu matembabuzi y'umuntu uyikize kumara igihe kigera ku mezi atandatu.
Facebook Forum