Inyuma y’imisi irenga cumi abana b'abigeme batatu bo mu Burundi bari bamaze iminsi bafunzwe bagirizwa gusibanganya ifoto y'umukuru w'igihugu c'Uburundi, Pierre Nkrunziza, kuri uno wa gatatu barekuwe vy'agategekanyo.
Bagihagarikwa bose hamwe bari indwi mu nyuma umuhungu w’imyaka 13 muri bo aza kurekurwa kubera ata myaka yo gufungwa yari akwije. Batandatu bagizwe n'abigeme mu bari basigaye baciye bajanwa mu gasho k’igipolisi kegukira intara ya Kirundo.
Batatu muri abo batandatu nabo nyene bahavuye barekurwa imbere y'uko abandi batatu basigaye bajanwa gufungirwa mw'ibohero ry'abana riri mu ntara ya Ngozi mu buraruko bw'Uburundi.
Imiryango y'abana barekuwe yabwiye Ijwi ry'Amerika ko inezerewe cane igasaba ko basubira kw'ishure.
Inkuru yateguwe n'umumenyeshmakauru w'Ijwi ry'Amerika mu Kirundo Jean Bosco Ndarurinze.
Facebook Forum