Reta zunze ubumwe z’Amerika zatanguye kurungikira ibikoresho vya gisirikare Isirayeri uno munsi ku wa Mungu.
Itangazo ibiro vya prezida w’Amerika ryasohoye ku muhingamo w’uno wa Mungu, rivuga ko Prezida Joe Biden yavuganye kuri terefone n’umushikiranganji wa mbere wa Isirayeri, Benjamin Netanyahu, amubwira ko ibikoresho vya mbere biri mu nzira bija muri Isirayeri, yongera amwizeza ko mu minsi ya vuba, Amerika izorungika ibindi bikoresho.
Ibiro vya prezida w’Amerika, bibicishije muri iryo tangazo, vyasiguye ko ukurungika vyihuse ibikoresho vya gisirikare vyo gufasha Isirayeri mu rugamba irimwo n’umurwi wa Hamas wo muri Palestina, ari ikimenyetso c’uko Amerika iri ku ruhande rwa Isirayeri.
Umushikiranganji wo kwivuna abansi muri Amerika, Lloyd Austin, nawe yavuze ko yategetse ingabo za Amerika zirwanira mu kirere no mu mazi ziri mu micungararo y’ibahari ya Mediteraneye kwegera akarere Isirayeri iherereyemwo.
Naho abanyepolitike benshi muri Amerika basa nk’abashigikiye ko Amerika iba ku ruhande rwa Isirayeri, ikomborwa ry’umukuru w’inama nshingamateka y’Amerika ryabaye muri ino ndwi, rizohava ribangamira ibikorwa bimwe bimwe vyo gufasha Isirayeri (AFP).
Umushikiranganji ajejwe imigenderanire y’Amerika n’ayandi makungu, Antony Blinken mu kiganiro yahaye tereviziyo y’Abanyamerika, CNN, yibukije ko mu 2016, guverenema y’Amerika yasinye amasezerano yo gufashisha Isirayeri hafi imiriyaridi zine z’amadorali, ku mwaka ku mwaka.
Blinken muri ico kiganiro na CNN, yavuze ko Amerika iriko ica mu nzira za kidiplomasiya yifashishije igihagararo cayo, kugira isabe impande zitandukanye kuba ku ruhande rwa Isirayeri, mu ntumbero yo gutuza Hamas, no gukinga ko intambara itandukira izindi mpande. (AFP)
Forum