Uko wahagera

U Rwanda Rwifatanije n'Isi mu Misa yo Gusabira Papa Benedigito wa 16


Kardinali Kambanda mu misa yo gusabira Papa Benedigito wa 16

Kuri uyu wa kane, Kiliziya gaturika yo mu Rwanda yifatanije n’iy’isi mu gitambo cy’ukaristiya cyo gusabira Papa Benedigito XVI washyinguwe I Vatikani uyu munsi.

Iki gitambo cy’ukaristiya cyabereye muri Kiliziya ya Regina Pacis I Remera mu mujyi wa Kigali. Misa yasomwe na Karidinali Antoine Kambanda, wari kumwe n’abepiskopi hafi ya bose bo mu Rwanda, igisonga cya Papa mu Rwanda, n’abakristu.

Ni imisa yagaragayemo abihayimana benshi biganjemo ababikira n’abapadiri baturutse mu maparuwase anyuranye yo mu Rwanda. Karidinali Antoine Kambanda wayoboye iki gitambo cy’ukaristiya, yabwiye abakitabiriye ko ari umunsi w’umwihariko mu mateka ya Kiliziya Gatolika.


Abandi bavuze amagambo bagarutse ku buhanga bwaranze Papa Benedigito wa XVI. Basobanuye ko yakunze kwandika ibitabo byifashishijwe mu kwigisha iyobokamana ku isi.

Usibye abahawe umwanya wo kuvuga, abakristu banyuranye banditse mu gitabo cyari cyabashyiriweho ku muryango wa Kiliziya. Mu butumwa bunyuranye banditse, hari uwavuze ati:" Imana yakire iyo ntore yamamaje ukwemera n’urukundo mu bantu." Undi mukristu wabaye I Roma yanditse ati:" wampaye umugisha, Yezu akwakire mu ntore ze”. Abandi batari bake bagarutse ku buhanga bwamuranze, bamusabira kuruhukira mu mahoro.

Usibye abamumenyeye mu bitabo yagiye yandika, ndetse no mu butumwa yatambukije mu nyandiko zinyuranye, Kardinali Kambanda we yasobanuye ko azi Papa Benedigito wa XVI kuko bagiye bahura mu bihe bitandukanye. Ni mu kiganiro kihariye yahaye Ijwi ry’Amerika Misa ihumuje. Kanda hasi wumve ikiganiro Kardinali Kambanda yagiranye n'Umunyamakuru w'Ijwi ry'Amerika Assumpta Kaboyi.

Rwanda: Imisa yo Guherekeza Papa Benedigito wa 16
please wait

No media source currently available

0:00 0:06:05 0:00


Papa Benedigito wa XVI yatorowe kuyobora Kiliziya y’isi yose ku wa 19/4/2005, yegura ku mirimo ye ku wa 28 z’ukwezi kwa 2/ 2013 kubera impamvu z’uburwayi.
Kuri Musenyeri Rukamba, uku kwegura kwabaye urufunguzo ko n’undi waba
adashoboye yakwegura.

Papa Benedigito XVI yitabye Imana afite imyaka 95. Ubusanzwe, yavukiye mu gihugu cy’Ubudage.

Facebook Forum

XS
SM
MD
LG