Mu Bwongereza abakunda iby’ubwami batangiye kugera mu murwa mukuru Londres aho imihanda itatse amabendera y’igihugu, n’imirongo miremire y’abantu baje gusezera bwa nyuma ku mwamikazi w’Ubwongereza Elizabeth II watanze nyuma y’imyaka 70 ari ku ngoma y'icyo gihugu.
Amazu afungurirwamo, n’amacumbi byatangiye kuzura abantu baje bitabiriye icyo gikorwa. Abakurikirana imikorere y’iby’amahoteli mu gihugu baravuga ko amacumbi mu gihugu hose amaze kuzura ku rugero rwa 95 ku ijana kandi abantu baracyaza.
Abashyitsi buzuye umujyi wa Londres baturutse mu buhugu bya kure nka Leta zunze ubumwe z’Amerika, n’Ubuhinde baragira uruhare mu guteza imbere ubucuruzi bw’iki gihugu mu gihe ubukungu bwacyo buri mu bihe bitoroshye kubera guta agaciro kw’ipawundi - ifaranga rikoreshwa muri icyo gihugu
Imyiteguro ikomeye yo gutabariza umwamikazi Elizabeth II igaragara muri iki gihe, imirongo miremire y’abasirikare bakora akarasisi, n’isanduku irimo umugogo we yateretsweho ikamba yajyaga yambara, byongeye kugaragaza imbaraga z’ingoma ya cyami muri iki gihugu n’uburyo amahanga ashishikariye gukurikirana ibyabwo.
Biteganijwe ko umwamikazi Elizabeth II azatabarizwa ku wa mbere w’icyumweru gitaha.
Facebook Forum