Abakekwaho kuba abarwanyi ba kiyisilamu, mw’ijoro ry’ejo ku cyumweru bishe abantu 18 mu mudugudu wo mu burasirazuba bwa Repuburika ya demokarasi ya Kongo mu gihe imirwano yongeye kwubura n’umutwe w’abarwanyi wa M23 mu ntara zihegereye.
Amakuru aturuka mu karere avuga ko abarwanyi bikekwa ko ari abo mu mutwe wa ADF, bishe abaturage kandi bagatwika amazu mu mudugudu wa Otomabere, muri teritwari ya Irumu, mu ntara ya Ituri. Byavuzwe n’umuntu wabyiboneye, umushefu mu karere hamwe n’umuryango uharanira uburenganzira bwa muntu muri ako karere.
Umuvugizi w’ingabo za Kongo, Jules Ngongo, yemeje ko ari igitero cya ADF, ariko ntiyatanga umubare w’abapfuye. Uyu muvugizi yanavuze ko barimo gushakisha abagabye icyo gitero.
Umutwe wa ADF ni uw’abarwanyi b’abanya-Uganda bimukiye mu burasirazuba bwa Kongo mu myaka ya za 90. Uyu mutwe uhora ugaba ibitero kandi wishe abantu barenga 1.300 hagati y’ukwezi kwa mbere umwaka wa 2021 n’ukwa mbere 2022 nk’uko ONU ibitangaza.
Kimwenza Malembe, umuturage w’aho Otomabere yagize ati: “Twarimo kuganira na zimwe mu ncuti hanze, ubwo twumvaga urusaku rw’amasasu, dukwirwa imishwaro. Hari ubwoba bwinshi”. Yunzemo agira ati: “Muri iki gitondo twabaruye abantu 18 bapfuye, bicishijwe ibyuma n’amasasu”.
Shefu wa teritwari ya Irumu, Jonas Izorabo Lemi, yavuze ko yamenyeshejwe ko hapfuye abantu 20. Christopher Munyanderu, umuhuzabikorwa w’umuryango
uharanira ko uburenganzira bwa muntu bwubahwa, CRDH, ukorera mu karere nawe yavuze ko imibare ya mbere yatanzwe ivuga ko hapfuye abantu 20.
Facebook Forum