Uko wahagera

Abayobozi Batatu b’Uburayi Barabonana na Perezida wa Ukraine I Kiev


Bamwe mu bategetsi baza guhurira Kiev

Abategetsi batatu bo ku mugabane w'Uburayi bagiye i Kiev mu murwa mukuru wa Ukraine kuri uyu wa kabiri mu gihe ingabo z'Uburusiya zikomeje kuwugabaho ibitero, buyigaba no mu yindi mijyi yo muri icyo gihugu mu byumweru bitatu bishize.

Ibisasu by'Uburusiya byibasiye Kiev umurwa mukuru wa Ukraine kuri uyu wa kabiri byahitanye byibuze abantu babiri. Umukuru w'uwo mujyi, Vitaly Klitschko, yatangaje umukwabo umara amasaha 36 uhereye mu ijoro ryo kuri uyu wa kabiri.

Kuri uyu wa kabiri Ministri w'Intebe wa Republika ya Ceke, Petr Fiala, yavuze ko ajya Kiev ari kumwe na Ministri w'Intebe wa Polonye, Mateusz Morawiecki, n'uwa Slovaniya Janez Jansa. Bahagarariye Umuryango w’Ubumwe bw'Uburayi mu nama bagirana na Perezida wa Ukraine, Volodymyr Zelenskyy, na Ministri w'Intebe Denys Shmyhal.

Abayobozi b’Ubumwe bw’Uburayi bavuga ko iyi nama igamije kugaragaza ko uwo muryango ushyigikiye ubusugire n'ubwigenge bwa Ukraine n'abaturage bayo ku buryo budasubirwaho.

Ubumwe bw'Uburayi bwatangaje ibindi bihano ku Burusiya birimo guhagarika gucuruzanya n'ibigo bya leta, no kudashora imari nshya mu bucuruzi bw'ibijyanye n'ingufu. Ibyo bihano kandi byashyizeho amabwiriza akarishye ku bucuruzi bw'ubutare n'umuringa n'ibindi bicuruzwa by'agaciro.

Uburayi kandi bwashyizeho ibihano ku bashimagiza cyangwa abagaragaza isura nziza y'Uburusiya no kugwiza abashyigikira uko bwitwaye mu kibazo cya Ukraine. Ibyo bihano bireba kandi ibigo by'indege, igisirikare, ibigo byubaka ubwato n'imashini zikoreshwa mu mirimo itandukanye.

Facebook Forum

XS
SM
MD
LG