Ku cyumweru tariki ya 27 Gashyantare 2022, umukinnyi w'Umunyaeritereya Natanael Tesafzion ukinira Androni Giocattoli yo mu Butaliyani, ni we wegukanye isiganwa ry'amagare Tour du Rwanda ry'uyu mwaka wa 2022.
Ni nyuma y'agace ka 8 ari na ko ka nyuma k'iri siganwa mpuzamahanga ngarukamwaka kareshyaga n'ibilometero 75 na metero 300, aho abasiganwa batangiriye kuri Canal Olympia ku i Rebero bazenguruka ibice bitandukanye by'umugi wa Kigali hanyuma basoreza aho ngaho kuri Canal Olympia.
Uwabaye uwa mbere muri aka gace ka 8 ni Umunyarwanda Moise Mugisha ukinira ikipe ya Protouch yo muri Afurika y'Epfo waciye agahigo ko kuba ari we Munyarwanda ubimburiye abandi gutwara étape y'iri siganwa kuva ryazamurwa mu ntera rigashyirwa ku kiciro cya 2.1. Yakoresheje amasaha 2, iminota 8 n'amasegonda 16. Yari ari kumwe n'abakinnyi babiri b'Abafaransa bo mu ikipe ya Direct Energie yo mu Bufaransa ari bo Alexandre Geniez na Sandy Dujardin, bamuretse agatambuka ngo asoze ari uwa mbere, kugira ngo na we asogongere ku buryohe bwo gutsinda agace ko ku rwego rwa 2.1.
Natnael Tesfazion, nyuma yo gukoresha amasaha 23, iminota 25 n'amasegonda 34 mu rugendo rwose hamwe rwa Tour du Rwanda rwareshyaga n'ibilometero 942 yahise yambikwa ikamba ry'uyu mwaka. Yegukanye iri siganwa ryari ribaye ku nshuro yaryo ya kane nyuma yo gushyirwa kuri 2.1 mu mwaka wa 2019.
Icyo gihe uwaryegukanye ni Merhawi Kudus Umunyaeritereya wakiniraga ikipe ya Astana yo muri Kazakhstan. Mu mwaka wa 2020, Tour du Rwanda yatwawe n'uyu nguyu Natnael Tesfazion wegukanye n'iy'uyu mwaka. Icyo gihe yakiniraga ikipe y'igihugu cye cya Eritereya. Umwaka ushize wa 2021, uwahize abandi muri Tour du Rwanda ni Christian Rodriguez Umunyaespagne ukinira ikipe ya Direct Energie yo mu Bufaransa.
Facebook Forum