Ingabo za Leta zunze ubumwe z'Amerika zirwanira ku butaka zatangiye kwirukana abasirikare ibihumbi banga kwikingiza Covid-19.
Mu itangazo yashyize ahagaragara, minisitiri wungirije w'ingabo zirwanira ku butaka, Christine Wormuth, avuga ko abadashaka kwikingiza ni ikibazo ku ngabo z'igihugu kuko babangamiye ububasha bwazo bwo guhora ziteguye. Kugeza ubu, minisiteri y'ingabo z'igihugu Pentagon ivuga ko abasirikare 79 bo mu mitwe yose itandukanye bapfuye bazize Covid-19.
Indi mitwe y'ingabo (Marines, izirwanira mu kirere n'izirwanira mu mazi), bafashe iya mbere yo gusezerera abasirikare bayo byibura 650 banze kwikingiza. Igisirikare kirwanira ku butaka cyo cyari kitarabirukana.
Minisitiri wungirije w'ingabo zirwanira ku butaka, Christine Wormuth, yandikiye ba komanda be bose, barimo n'uw'ishuri rikuru rya West Point, ababwira guhita batangira kubasezerera. Ikigo ntaramakuru AP kivuga ko abashobora gusubira mu buzima bwa gisivili barenga 3.300. Abandi bose 97% barikingije.
Kwikingiza byari itegeko ku basilikare bose ba Leta zunze ubumwe z'Amerika, keretse ku bafite impamvu z'uburwayi cyangwa imyemerere yabo y'idini. (VOA/AP/Reuters/AFP)
Facebook Forum