Abategetsi mu butungane bwa Reta zunze ubumwe z’Amerika bariko barakora ibishoboka kugira bamenye kandi bahagarike abayoboke ba Perezida Donald Trump baharurwa mu majana bagize uruhara mu midugararo ya mbere yabaye ku nyubakwa ya Kongre mu myaka irenga ibinyejana bibiri.
Igiporisi carahagaritse abarenga cumi ku muhingamo wo ku musi wa gatatu igihe iyo migumuko yatangura, abandi batari bake babandanije bahagarikwa. Abategetsi bavuga ko uruhigi rw’abasigaye rukibandanya. Bavuga ko igikorwa co kumenya no gufata abasigaye kizofata indwi zitari nke.
Umushikiranganji w’ubutungane ivy’imfatakibanza, Jeffrey Rosen yavuze ko ubushikiranganji arongoye bwiyemeje ko abo bose bagize uruhara muri ico gitero kuri reta no guca kubiri n’amategeko bazobona ingaruka ku bikorwa bakoze.
Yavuze ko inyamiramabi hamwe n’ibindi bisata bijejwe umutekano bafadikanije n’igiporisi bamaze ijoro ryose begeranya ivyemeza, bamenya ababigizemwo uruhara kandi babafata.
Ibihano bitari bike vyitezwe gutangazwa ku musi wa kane, ibindi mu misi hamwe n’indwi ziri imbere, nkuko uwo mutegetsi yabivuze.
Perezida Trump yaraneguwe n’abatari bake kuba ari we yahamagariye abanywanyi biwe kuja ku nyubako ya Kongre kuburizamwo umuhango wo kwemeza intsinzi ya Joe Biden.
Abaporisi barenga 50 ba Kongre hamwe n’abo umugwa mukuru Washington barakomeretse, abandi batwarwa mu bitaro.
Facebook Forum