Muri Leta zunze ubumwe z'Amerika, urubanza rwa Derek Chauvin rwatangiye uyu munsi mu mizi yarwo mu mujyi wa Minneapolis, muri leta ya Minnesota, mu majyaruguru y'igihugu. Derek Chauvin ni umupolisi w'Umuzungu ushinjwa kwica Umwirabura George Floyd mu kwezi kwa gatanu mu mwaka ushize.
Urubanza mu by'ukuri rumaze ibyumeru bitatu rutangiye, ariko imilimo yarwo kugeza ubu yari iyo gutoranya abaturage bagombaga gukora urukiko rwa rubanda, jury, rwo kuruburanisha mu mizi. Aka kazi ntikari koroshye kubera ukuntu urupfu rwa Floyd rwabaye kimomo.
Kubona abaturage batabogamye byabaye ingorabahizi, ariko amaherezo, umucamanza, ubushinjacyaha, n'abavoka ba Chauvin babashije gutoranya 12, barimo Abirabura bane, bicaye nk'urukiko, n'abandi bane bashobora kuba abasimbura.
Umushinjacyaha ni we watanze ijambo ry'iriburiro. Arega Derek Chauvin icyaha cy'ubuhotozi atari yateguye. Chauvin we aragihakana. Araburana ari yidegembya nyuma yo gutanga ingwate y'amadolari miliyoni imwe mu kwezi kwa 10 gushize. Hagati aho, polisi y’umujyi wa Minneapolis yamwirukanye ku kazi. Icyaha kimuhamye ashobora gukatirwa kugera ku myaka 40 y'igifungo.
Mbere y'uru rubanza, umujyi wa Minneapolis wumvikanye n'umuryango wa Floyd ku italiki ya 12 y'uku kwezi ko ugomba kuwuha impozamalira zinganga n'amadolari miliyoni 27.
Urubanza rushobora kumara ukwezi. Abahanga mu by'amategeko bemeza ko rushobora kuba ikitegererezo kubera ko, akenshi na kenshi, abapolisi batajya bahanirwa kwica abasivili.
Umutekano w'urukiko urarinzwe cyane bikomeye. Ingoro yarwo ikikijwe n'ibidandi bitatu by'isima bitandukanye, insinga ziriho amahwa. Abasilikali ba leta ya Minnesota, National Guard, nabo baryamiye amajanja. Ubutegetsi bufite impungenge z'imyigaragambyo nk'iyakurikiye urupfu rwa George Floyd.
Facebook Forum