Uko wahagera

Uburusiya n'Ubushinwa Bisaba Inama Yiga ku "Myitwarire ya USA"


Perezida w'Ubushinwa Xi Jiping na Mugenzi we w'Uburusiya Vladmir Putin
Perezida w'Ubushinwa Xi Jiping na Mugenzi we w'Uburusiya Vladmir Putin

Minisitiri w'ububanyi n'amahanga wa Leta zunze ubumwe z'Amerika, Antony Blinken, ari i Buruseli mu nama y'iminsi ibiri na bagenzi be b'ibindi bihugu bigize umuryango w'ubutabarane wa gisilikali OTAN. Ubushinwa n'Uburusiya biri mu byo inama ivugaho.

Umubano w'ibihugu by'uburengerazuba bw'isi n'Ubushinwa n'Uburusiya urimo amakimbirane cyane muri iki gihe. Leta zunze ubumwe z'Amerika, Umuryango w’ubumwe bw’ibihugu by’Ubulayi, Ubwongereza na Canada bafatiye ibihano Ubushinwa kubera ikibazo cy'Abashinwa bo mu bwoko bw'aba Uighur, bari no mu idini ry'Abayisilamu, biganje mu ntara ya Xinjiang," iri mu majyaruguru y'uburengerazuba bw'Ubushinwa. Leta zunze ubumwe z'Amerika ivuga ko barimo bakorerwa jenoside.

Ubushinwa nabwo bwahise bufatira ibihano abategetsi icumi bo mu bihugu by'Umuryango w’ubumwe bw’ibihugu by’Ubulayi. Uburusiya nabwo bumaze igihe buri mu bihano kubera kwigarurira intara ya Crimée, yo mu burasirazuba bw'igihugu cya Ukraine, no guhutaza abatavuga rumwe n'ubutegetsi.

Ubushinwa n'Uburusiya bavuga ko ibihano bafatiwe nabo bibatera kwifatanya kurushaho. Ba minisitiri b'ububanyi n'amahanga babo, Wang Yi na Sergei Lavrov, barangije inama y'iminsi ibiri mu mujyi wa Nanning, mu majyepfo y'Ubushinwa.

Mu itangazo ryashoje iyi nama, bavuze ko Ubushinwa n'Uburusiya badashobora "kwihanganira ko ibihugu by'uburengerazuba byivanga mu bibazo bwite byabo, gushaka kubategeka gukurikiza demokarasi nk'uko byo biyumva, no guhonyora amategeko mpuzamahanga."

Ubushinwa n'Uburusiya basabye kandi inama yihutirwa y'inteko y'Umuryango w'Abibumbye ishinzwe umutekano ku isi kugira ngo yige ku "myitwarire ya Leta zunze ubumwe z'Amerika (bavuga ko) igamije gusenya." Iyi nteko igizwe nyine n'Ubushinwa n'Uburusiya, Leta zunze ubumwe z'Amerika, Ubwongereza n'Ubufaransa.

Facebook Forum

XS
SM
MD
LG