Leta zunze ubumwe z'Amerika n'Umuryango w’ubumwe bw’ibihugu by’Ubulayi bafatiye ibihano Ubushinwa kubera ibibazo by'uburenganzira bw'ikiremwa muntu muri Hong Kong no mu ntara ya Xinjiang, iri mu majyaruguru y'uburengerazuba bw'Ubushinwa.
Leta zunze ubumwe z'Amerika yahannye abantu 24. Barimo uwitwa Wang Chen, umwe muri 25 bagize Politburo, ni ukuvuga urwego rwo hejuru rutegeka ishyaka rya gikomunisiti n'igihugu mu Bushinwa, na Tam Yiu-chung, uhagarariye Hong Kong muri komite nyobozi y'inteko ishinga amategeko y'Ubushinwa. Harimo n'abandi bo mu buyobozi bw'inzego z'umutekano za Hong Kong.
Ibihano bibabuza kubona viza zo kujya muri Leta zunze ubumwe z'Amerika no gukorana n'ibigo by'imari by’Amerika. Ariko mu itangazo yashyize ahagaragara, minisitiri w'ububanyi n'amahanga wa Leta zunze ubumwe z'Amerika, Antony Blinken, avuga ko n'ibigo by'imari by'amahanga, ayo ari yo yose, bizakorana nabo nabyo bizafatirwa ibihano na Leta zunze ubumwe z'Amerika.
Blinken asobanura ko ibi bihano byatewe n'amategeko y'Ubushinwa mashya agenga amatora muri Hong Kong. Ateganya ko abadepite benshi ba Hong Kong bazajya bashyirwaho n'Ubushinwa. Agabanya cyane abadepite batorwa n'abaturage ba Hong Kong.
Ku muvugizi wa minisiteri y'ububanyi n'amahanga y'Ubushinwa, Zhao Lijian, Leta zunze ubumwe z'Amerika yivanze mu bibazo bwite by'Ubushinwa. Mu kiganiro yagiranye n'abanyamakuru i Beijing, yatangaje ko nabo bazafatira Leta zunze ubumwe z'Amerika "ibyemezo bikwiye."
Mu kwezi kwa 10 gushize, Amerika yari yafatiye ibihano abantu icumi kubera Hong Kong, barimo umuyobozi wa leta ya Hong Kong Carrie Lam. Uretse Leta zunze ubumwe z'Amerika, Umuryango w’ubumwe bw’ibihugu by’Ubulayi nawo urateganya ibihano ku Bushinwa. Ba ambasaderi b'ibi bihugu bemeje ko abayobozi b'Ubushinwa bane n'ikigo kimwe cy'ubucuruzi cy'Ubushinwa bagomba kwimwa viza no gufatirwa imitungo yabo iri mu bihugu by'Ubulayi bwunze ubumwe. Banze ariko gutangaza amazina yabo kugera igihe ba minisitiri b'ububanyi n'amahanga ubwabo bafatira umwanzuro kuwa mbere w'icyumweru gitaha.
Ubulayi burabaziza uruhare rwabo mu "bikorwa bikabije byo guhonyora uburenganzira bw'abaturage b'Ubushinwa b'Abayisilamu bo mu bwoko bwa Uighur, biganje mu ntara ya Xinjiang."
Imiryango iharanira uburenganzira bwa muntu n'Umuryango w'Abibumbye bemeza ko aba-Uighur bagera kuri miliyoni bafungiwe mu bigo "by'iyicarubozo, imilimo y'uburetwa, no kubafunga imyanya y'imyororokere kugirango batabyara." Danemark, Canada, na Leta zunze ubumwe z'Amerika bo bemeza ahubwo ko ibyo bikorwa bishobora kwitwa jenoside.
Ubushinwa bubitera utwatsi, ahubwo bukavuga ko ibigo byo muri Xinjiang bufungiramo aba-Uighur bigamije kubigisha imyuga no kubaranduramo amahame y'ubutagondwa bwa kisilamu.
Facebook Forum