Uko wahagera

Amerika Irarega Uburusiya na Irani Kwivanga mu Matora Yayo


Perezida w'Uburusiya, Vladimir Putin, (ibumoso) ari kumwe n'uwa Irani, Hassan Rouhani (iburyo).

Leta zunze ubumwe z'Amerika irarega Uburusiya na Irani ko bivanze mu matora yayo yo mu kwezi kwa 11 gushize. Mu cyegeranyo yashyize ahagaragara, umuhuzabikorwa w'inzego z'ubutasi za Leta zunze ubumwe z'Amerika atangaza ko Uburusiya bwahinduye uburyo bwakoresheje.

Mu 2016, bwinjiye mu ikoranabuhanga ry'amatora. Naho mu matora yo mu 2020, "Perezida w'Uburusiya, Vladimir Putin, yategetse inzego z'iperereza ze gukora ibishoboka byose byo gusebya no gutesha agaciro kandida Joe Biden n'ishyaka rye ry'Abademokarate no gutera inkunga kandida Donald Trump."

Ku birebana na Irani, icyegeranyo kivuga ko yakoresheje uburyo butandukanye bwo kubangamira kandida Trump ariko nta guha inkunga kandida Biden. Uburusiya na Irani baregwa ko bagerageje cyane cyane gucukura urwobo kurushaho mu macakubiri asanzwe ari hagati y'abaturage ba Leta zunze ubumwe z'Amerika no kubabibamo amakenga kuri demokarasi yabo.

Uretse Uburusiya na Irani, icyegeranyo kivuga ko hari n'andi mahanga, nka Cuba, Venezuela n'umutwe wa Hezbollah washinzwe na Irani muri Libani, nayo yivanze mu matora. Ariko kivuga ko Ubushinwa bwo butarimo. Uwari umukuru w'igihugu, Donald Trump, n'abayoboke be bo bavugaga ko Ubushinwa ari bwo bwivanze mu matora kugirango bufashe Joe Biden kuyatsinda.

Iki cyegeranyo cyari cyararangiye Perezida Trump akiri ku butegetsi mu kwezi kwa mbere gushize, ariko nticyagiye ahabona. Cyanzura kivuga ko abagerageje bose kwivanga mu matora yo mu kwezi kwa 11 gushize babinaniwe kubera ingamba Leta zunze ubumwe z'Amerika yari yarafashe zo kubikumira.

Facebook Forum

XS
SM
MD
LG