Uko wahagera

Perezida Mahamadou Issoufou Yegukanye Igihembo Kitiriwe Mo Ibrahim


Perezida Mahamadou Issoufou wa Nijeri

Perezida wa Nijeri ucyuye igihe Mahamadou Issoufou, w'imyaka 68 y'amavuko, ategetse manda ebyiri zikurikiranye kuva mu kwezi kwa kane 2011. Yubahirije itegeko nshinga ribuza umukuru w'igihugu manda ya gatatu. Aritegura gutanga ubutegetsi mu mahoro, bwa mbere mu mateka ya Nijeri, mu kwa kane gutaha, nyuma y'amatora mu kwezi gushize.

Mu itangazo yashyize ahagaragara, umuyobozi w'ikigo gitanga igihembo kitiriwe Mo Ibrahim, Festus Mogae, wahoze ari umukuru w'igihugu cya Botswana, asobanura ko Mahamadou Issoufou agihawe kubera ko "atatatiye amasezerano yagiranye n'abaturage ba Nijeri, abayobora inzira yo gutera imbere mu bihe bikomeye cyane bya politiki, ubukungu, ubutayu budasiba kwiyongera mu gihugu cyabo, no guhangana n'intagondwa."

Igihembo Mo Ibrahim gihabwa abantu bayoboye ibihugu cyangwa guverinoma muri Afrika yo munsi y'ubutayu bwa Sahara baba baratowe na rubanda, bava ku butegetsi nyuma ya manda ziteganyijwe n'itegeko nshinga, kandi babaye indashyikirwa mu mitegekere yabo.

Hari hashize imyaka itatu cyarabuze ugihabwa. Mahamadou Issoufou abaye uwa gatandatu ucyegukanye kuva cyashingwa mu 2006, nyuma ya Joaquim Chissano wa Mozambique, Festus Mogae wa Botswana, Pedro Pires wa Cap Vert, Hifikepunye Pohamba wa Namibiya, na Ellen Johnson Sirleaf wa Liberiya. Perezida Nelson Mandela w'Afrika y'Epfo we yagihawe ku buryo bw'icyubahiro gusa mu 2017.

Utwaye igihembo Mo Ibrahim ahabwa amadolari miliyoni eshanu rimwe rukumbi, hakiyongeraho andi madolari ibihumbi 200 buri mwaka ubuzima bwe bwose.

Facebook Forum

XS
SM
MD
LG