Umuryango w’Abibumbye (ONU) watangaje ko abantu barenga 1000 biganjemo abo mu bwoko bw’Abatigrinya batawe muri yombi muri Etiyopiya mu cyumweru kimwe.
Itangazo ryasohowe na komiseri mukuru w’ishami rya ONU ryita ku burenganzira bwa muntu Michelle Bachelet, rivuga ko ibyabaye bihangayikishije kandi ahanini abafashwe bakomoka mu ntara ya Tigreya.
Umuvugizi wa guverinema ya Etiyopiya, Legesse Tulu, ntacyo yavuze kuri icyo kibazo. Polisi mbere yari yavuze ko gufata abantu bidashingiye ku bwoko, ariko ko hagamijwe guta muri yombi abashyigikiye umutwe w’ingabo wa TPLF.
ONU yavuze ko, abantu babayeho nabi mu bigo bafungiyemo, ko bacucikiranye kandi benshi batabwiwe impamvu bafashwe.
Igihugu cya Etiyopiya cyatangaje ko kiri mu bihe bidasanzwe kw’itariki ya 2 y’uku kwezi kwa 11. Wari umwaka umwe nyuma y’uko ubushyamirane bwadutse hagati ya guverinema y’igihugu cyose n’ingabo ziri ku ruhande rw’ishyaka rya politiki TPLF, rigenzura intara ya Tigreya mu majyaruguru y’igihugu.
Ibihe bidasanzwe byatangajwe, bizamara amezi atandatu, bifashe guta muri yombi abakekwa nta kuburana igihe cyose igihugu kizaba kiri mu bihe bidasanzwe kandi bitume haba gusaka inzu ku yindi nta mpapuro z’urukiko zikewe.
Facebook Forum