Indege z'intambara za Etiyopiya zongeye kurasa i Mekele, umurwa mukuru wa Tigreya. Umuvugizi wa guverinoma ya Etiyopiya, Legesse Tulu, yabwiye itangazamakuru ko indege zarashe aho ingabo za Tigreya zikorera kandi zisanira intwaro ziremereye.
Umuvugizi wa Tigreya yabihakanye, yemeza ko aho zarashe ari inyubako yari ibitsemo ibiziga by'imodoka bishaje. Ati: "Ni yo mpamvu hagurumanye." Naho bamwe mu baturage bavuga ko zarashe ikigo cy'uruganda, batavuga icyo rukora.
Kugeza ubu, ntibiramenyekana niba hari abo indege zahitanye. Ariko amashusho yatambutse ku mbuga nkoranyambaga zitandukanye yerekana abantu bakomeretse.
Ni ubwa kabiri indege z'intambara za Etiyopiya zirashe i Mekele. Ejobundi kuwa mbere, zarashe ku byo leta ya Etiyopiya ivuga ko ari iminara n'ibindi bikoresho by'itumanaho. Ibigo ntaramakuru bitandukanye bivuga ko zahitanye abana batatu. Nta mirwano yari iherutse i Mekele kuva mu kwezi kwa gatandatu gushize, mu gihe intambara yo muri Tigreya igiye kumara umwaka.
Facebook Forum