Uko wahagera

Ikibazo cy'Abacanshuro b'Abarusiya muri Mali Cyahagurukije Ubufransa


Minisitiri w'ingabo w'Ubufaransa, Madame Florence Parly

Minisitiri w'ingabo w'Ubufaransa, Madame Florence Parly, ari muri Mali, aho agomba kuganira n'abategetsi b'iki gihugu ku kibazo cy'abacanshuro b'Abarusiya.

Leta ya Mali iherutse gutangaza ko iri hafi kuzuza amasezerano na sosiyete yigenga y'abacanshuro yo mu Burusiya yitwa Wagner. Amasezerano ateganya ko Wagner izohereza muri Mali abasirikare bayo byibura igihumbi, kugirango barinde umutekano w'abategetsi, kandi bahugure n'ingabo za Mali.

Ubufaransa, bwahoze bukoloniza Mali, bwabyakiriye nabi, bushaka kubiburizamo. Nk'uko Florence Parly yabitangarije abanyamakuru, arateganya kubwira abayobozi ba Mali, barimo minisitiri wayo w'ingabo, Colonel Sadio Camara, ko abasirikare b'Ubufaransa bari muri Mali "badashobora kubangikana n'abacanshuro b'Abarusiya."

Ingabo z'Ubufaransa, zirenga 5.000, zimaze imyaka umunani muri Mali mu rwego rwo kurwanya abajihadisiti. Ubudage (bufiteyo abasirikare bagera ku 1.500 bafatanyije n'Abafaransa) na CEDEAO (Umuryango w'ubukungu w'ibihugu by'Afrika y'Uburengerazuba) nabo batangaje ko batishimiye umugambi wa Mali. Minisitiri w'ingabo w'Ubudage, Madame Annegret Kramp Karrenbauer, yatangaje kuri Twitter, ati: "Mali niramuka yujuje amasezerano na Wagner, bizatuma manda yacu muri Mali irangira."

Mu itangazo yashyize ahagaragara, guverinoma ya Mali iravuga ko "idashobora kwemerera igihugu na kimwe kuyihitiramo icyo ari cyo cyose, no kuyibwiriza abo igomba gukorana nabo." Yongeraho ko "ari yo yonyine ishinzwe ubusugire bw'igihugu." Sosiyete Wagner ifitanye amasezerano na Repubulika ya Centrafrika kuva mu 2018. Ariko abacanshuro bayo bashinjwa ibikorwa by'ubugome ku baturage no gusahura umutungo kamere n'amabuye y'agaciro.

Usibye muri Repubulika ya Centrafrika, ibitangazamakuru bitandukanye byo mu bihugu byo mu burengerazuba bw'isi bivuga ko Wagner ifite abacanshuro bayo no muri Libiya, Sudani, na Mozambique.

Facebook Forum

XS
SM
MD
LG