Urukiko mpuzamahanga mpanabyaha ruhoraho, CPI mu magambo ahinnye y'Igifaransa, ruramagana ibihano Leta zunze ubumwe z'Amerika yafatiye abakozi barwo bakora anketi byaha by'intambara muri Afghanistani.
Mu itangazo yashyize ahagaragara, perezida w'inama rusange y'ibihugu bigize CPI, umucamanza O-Gon Kwon, avuga ko ibyemezo bya Leta zunze ubumwe z'Amerika "bibangamiye ubushake bwo kurwanya umuco wo kudahana no kuryoza ibyaha byabo abakora amahano ndengakamere."
Itangazo rirakomeza, riti: "Ibyemezo by'Amerika biri mu rwego rw'ibindi bikorwa byinshi byayo byo kwibasira CPI. Ntibishora kwihanganirwa kuko bikoma mu nkokora imilimo y'Urukiko n'ihame ryo kugendera ku mategeko."
Perezida w'inama rusange y'ibihugu bigize CPI, umucamanza O-Gon Kwon, avuga ko yatumije inama y'igitaraganya ya biro y'inama rusange mu cyumweru gitaha kugirango barebere hamwe igikwiye gukorwa. Arasaba ibihugu byose biri muri CPI kongera gushimangira "ubushake
bwo kurengera ubusugire bw'Urukiko, badaciwe intege n'uwo ari we wese wibasira CPI, abayobozi bayo, abakozi bayo n'imiryango yabo."
Umuryango w'Abibumbye, ishami ryawo rishinzwe uburenganzira bwa muntu, nawo uravuga ko "ubwigenge bwa CPI n'uburenganzira bwayo bwo gukora ntawe uyivangira, ku buryo ubwo ari bwo bwose, bigomba kubahirizwa. Abahohotewe n'ibyaha ndengakamere bafite uburenganzira ku butabera no ku kuri."
Josep Borrell, umuyobozi w'urwego rushinzwe ububanyi n'amahanga rw'Umuryango w'ibihugu by'Ubulayi bwunze ubumwe, nawe yatangaje ko ibyemezo bya Leta zunze ubumwe z'Amerika "bihangayikishije cyane." Yavuze ko Ubulayi bushyigikiye CPI.
Umuryango mpuzamahanga uharanira uburenganzira bwa muntu. Human Rights Watch, watangaje ko "iki gitero kuri CPI kigamije kwima ubutabera abahohotewe bikabije muri Afghanistani, muri Israheli no muri Palestina. Ibihugu bishyigikiye ubutabera mpuzamahanga byari bikwiye kubyamagana ku mugaragaro."
CPI, idafite aho ihuriye n'Umuryango w'Abibumbye, igizwe n'ibihugu 120, birimo n'Afghanistani. Leta zunze ubumwe z'Amerika yo ntiyirimo.
Umushinjacyaha mukuru wa CPI, Fatou Bensouda, yatangaje ko ashaka gukora anketi ku byaha by'intambara n'ibyaha byibasiye inyokomuntu, bishobora kuba byarakozwe muri Afghanistani kuva mu mwaka w'2003 kugera mu 2014. Anketi zireba n'abasilikali b'Amerika barwanye muri Afghanistani n'abakozi ba CIA, ikigo cy'Amerika gishinzwe ubutasi mu mahanga.
Byatumye perezida wa Leta zunze ubumwe z'Amerika, Donald Trump, asinya, ejo kuwa kane, iteka riha ububasha minisitiri w'ububanyi n'amahanga, Mike Pompeo, na minisitiri w'imali ya leta, Steven Mnuchin, bwo gufatira imitungo aba bakozi ba CPI, Urukiko mpuzamahanga mpanabyaha ruhora, bashobora kuba bafite muri Leta zunze ubumwe z'Amerika. Ryemerera kandi Pompeo kubima uruhushya, viza, rwo kwinjira muri Leta zunze ubumwe z'Amwerika. Ariko ntirivuga uko bangana n'amazina yabo.
Guverinoma ya Perezida Trump ivuga ko CPI ari "urukiko rudashobora kwizerwa, rwamunzwe na ruswa kugera mu nzego zarwo zo hejuru." Ivuga kandi ko "Uburusiya bushobora kuba ari bwo buri inyuma y'anketi za CPI ku myitwarire y'abasilikali b'Amerika mu ntambara yo muri Afghanistani."
Facebook Forum