Uko wahagera

Perezida Trump Yategetse Ibihano ku Bakozi ba CPI Batohoje kuri USA


Perezida wa Leta zunze ubumwe z'Amerika, Donald Trump, yategetse ibihano ku bakozi ba CPI bafite uruhare muri anketi ku byaha by'intambara bakeka ku basilikali b'Amerika muri Afghanistani.

Iteka Perezida Trump yashyizeho umukono ryemerera minisitiri w'ububanyi n'amahanga, Mike Pompeo, na minisitiri w'imali ya leta, Steven Mnuchin, gufatira imitungo aba bakoze ba CPI bashobora kuba bafite muri Leta zunze ubumwe z'Amerika. Ryemerera kandi Pompeo kubima uruhushya, viza, rwo kwinjira muri Leta zunze ubumwe z'Amerika.

Leta zunze ubumwe z'Amerika ntiri muri CPI. Bityo CPI nta bubasha iyifiteho. Ariko Afghanistani yo iri muri CPI. Ni yo mpamvu uru rukiko rufite ububasha bwo gukorayo anketi, n'uwo bwose Afghanistani ivuga ko ibyaha by'intambara byose byaba byarabaye bigomba kuburanishwa n'inkiko zayo.

Umushinjacyaha mukuru wa CPI, Fatou Bensouda, yatangaje ko ashaka gukora anketi ku byaha by'intambara n'ibyaha byibasiye inyokomuntu, birimo kwica abasivili batagira ingano n'iyicarubozo, bishobora kuba byarakozwe kuva mu mwaka w'2003 kugera mu 2014.

Nk'uko ikigo ntaramakuru Reuters cyo mu Bwongereza kibitangaza, guverinoma ya Perezida Trump ivuga ko CPI ari "urukiko rudashobora kwizerwa, rwamunzwe na ruswa kugera mu nzego zayo zo hejuru. Ivuga kandi ko Uburusiya bushobora kuba ari bwo buri inyuma y'anketi za CPI ku myitwarire y'abasilikali b'Amerika mu ntambara yo muri Afghanistani."

Facebook Forum

XS
SM
MD
LG