Uko wahagera

Amashirahamwe 12 Asaba UE Gukomeza Igitutu ku Burundi


Perezida w'Uburundi Evariste Ndayishimiye

Umuryango uharanira ubwisanzure bw'itangazamakuru ku isi CPJ urasaba Umuryango w'Ubumwe bw'Ubulayi gukomeza igitutu kuri leta y'Uburundi kugirango yubahirize uburenganzira bw'abanyamakuru. CPJ ni rimwe mu mashyirahamwe 12 yandikiye Umuryango w'Ubumwe bw'Ubulayi urwandiko rumwe ku burenganzira bwa muntu mu Burundi muri rusange.

Ku gice kirebana n'itangazamakuru by'umwihariko, CPJ iravuga ko mu mwaka Perezida Evariste Ndayishimiye amaze ku butegetsi hahindutse utuntu duke cyane, turimo guha imbabazi abanyamakuru bane b'ikinyamakuru cyigenga Iwacu bari barafunzwe mu 2019, no gutangiza ibiganiro n'abahagarariye ibitangazamakuru mu Burundi.

CPJ irakomeza, iti: "Leta y'Uburundi ihora yizeza impinduka. Nyamara, mu binyamakuru byafunzwe mu 2015, Radio Bonesha ni yo yonyine yongeye gufungura muri uyu mwaka. Radiyo y'Abongereza BBC na radiyo Ijwi ry'Amerika ziracyafunze kuva mu 2018. Nta bwisanzure ibinyamakuru byigenga bike cyane bigikora bifite. Ubwabyo byibuza gukora umwuga neza kubera gutinya ingaruka mbi, ibyo bita "auto-censure" mu rurimi rw'Igifaransa. Abanyamakuru ntibasiba guterwa ubwoba no gutotezwa na guverinoma n'abayobozi b'ishyaka riri ku butegetsi. Nta anketi igaragara yigeze ikorwa ku izimira ry'umunyamakuru w'ikinyamakuru Iwacu Jean Bigirimana mu 2016, no ku rindi hohotera rikorerwa abanyamakuru."

CPJ n'indi miryango bafatanyije barasaba rero Umuryango w'Ubulayi kubanza kureba ibi byose mbere yo gukuraho ibihano wafatiye Uburundi.

Facebook Forum

XS
SM
MD
LG