Abanyepalistina 30 baguye mu gitero cy’indege y’intambara cyagabwe ku nkambi y’impunzi ya Al-Maghazi mu ijoro ryo ku wa gatandatu rishyira ku cyumweru. Abandi benshi bakomerekeye muri icyo gitero.
Ibiro ntaramakuru byo muri Palestina, WAFA, byari byatangaje ko cyahitanye abagera kuri 51. Igisirikare cya isirayeli nticyabonetse ngo kigire ibyo kivuga kuri iki gitero.
Ibitero nkiki byibanze mu bice byo mu majyaruguru ya Gaza aho abantu 300,000 batuye muri ako gace bacumbitse mu nkambi zashyizweho na ONU. Imwe muri zo kuwa gandandatu yarashweho hapfa abantu 15 abandi benshi barakomereka.
Ministeri y’Ubuzima muri Gaza ivuga ko mu masaha 24 ashize abantu bagera kuri 231 bamaze kugwa muri iyi ntambara ishyamiranyije Isirayeli n’umutwe wa Hamas. Kuva yatangira imaze guhitana abakabahaba 10,000.
Hagati aho Ministri w’ububanyi n’Amahanga w’Amerika, Athnony Blinken, kuri iki cyumweru ari muri Turukiya mu biganiro Amerika ivuga ko 'byibanda ku kurinda abasivili mu ntara ya Gaza'.
Ku wa gatandatu Perezida Recep Tayyip Erdogan wa Turukiya yavuze ko ashaka ko amahoro agaruka muri ako karere kandi hakaboneka leta yigenga ya Palestina. Turukiya kandi yatangaje ko igiye guhamagaza amabasaderi wayo muri Isirayeli.
Isirayeli yahamagaje abayihagarariye muri Turukiya mu kwezi guhize nyuma y’uko Erdogan avuze ko abarwanyi ba Hamasi baharanira ukwishyira ukizana, ko atababona nk’umutwe w’iterabwoba nkuko Amerika, Ubwongereza, n’ibindi bihugu byo ku mugabane w’Uburayi bababona.
Forum