Umusilikare wayoboye kudeta yahiritse Perezida wa Gabon, Ali Bongo, uyu munsi kuwa mbere, yarahijwe nka perezida w’agateganyo n’abacamanza b’urukiko rushinzwe iyubahirizwa ry’itegeko nshinga.
Hari mu muhango watambukijwe kuri televisiyo, hagamijwe gushimangira ububasha bw’itsinda ry’abo basirikare ku butegetsi.
Abofisiye bayobowe na Jenerali Brice Oligui Nguema, bafashe ubutegetsi kw’itariki ya 30 y’ukwezi gushize kwa 8 iminota mike nyuma y’uko bitangajwe ko Bongo yabonye amajwi amugeza muri manda ya gatatu. Ayo majwi bayagize impfabusa kandi bavuga ko atemewe.
Nguema yahawe icyubahiro n’abofisiye mu gisilikare bari bateranye hamwe n’abayobozi, ubwo yari ageze mu muhango wo kurahira na nyuma amaze kurahizwa. Televiziyo ya Leta yagaragaje amashusho y’imbaga yamuhaga amashyi na za burende zirasa mu nyanja, nk’ikimenyetso kitazibagirana kuri uyu munsi.
Kudeta yasezereye ubuyobozi bw’umuryango wa Bongo, nyuma y’imyaka 56, mu gihugu gikize kuri peteroli, yakuruye imbaga yagaragaje ibyishimo mu mihanda yo mu murwa mukuru Libreville.
Mu burengerazuba no muri Afurika yo hagati, habaye kudeta umunani mu myaka itatu. ((Reuters))
Forum