Minisitiri w’ububanyi n’amahanga wa Leta zunze ubumwe z’Amerika, Anthony Blinken, avuye Addis Abeba yakomereje uruzinduko rwe muri Nijeri, aho ari butangaze imfashanyo nshya y’ubutabazi uyu munsi kuwa kane, muri iri iki gihugu cyo mu karere ka Sahel mu burengerazuba bw’Afurika.
Amerika ishaka gufasha Nijeri mu gihe ihanganye n’inyeshyamba za kiyislamu. Uruzinduko rwa Blinken muri Nijeri, ni urwa mbere rw’umuminisitiri w’ububanyi n’amahanga w’Amerika, agiriye muri iki gihugu, rugaragaza akamaro kacyo nk’incuti yayo mu karere ka Sahel. Ibi byavuzwe n’umutegetsi wo mu rwego rwo hejuru muri deparitema ya Leta na we uri muri urwo rugendo.
Uwo mutegetsi yagize ati: “Turakeka ko barimo guhitamo neza, mu gufasha mu bijyanye n’ibitero bikunze gukorwa muri Sahel. Bityo rero, turagerageza kugaragaza urwo rugero rwiza”.
Nijeri, igihugu kidakora ku nyanja, hamwe n’ibindi bihugu byo mu karere ka Sahel, harimo Mali, Burkina Faso, Nijeriya na Cadi, byose ntibyorohewe mu rugamba bihanganyemo n’inyeshyamba, rimwe na rimwe zagiye zigarura ubutaka bw’ibihugu.
Uwo mutegetsi yashimagije perezida wa Nijeri, Mohamed Bazoum, warwanyije kudeta za gisilikare muri Mali no muri Burkina Faso kandi wagishije inama inteko ishinga amategeko ku bibazo birebana n’umutekano, aho kubifatira ibyemezo wenyine.
Yanashimye Bazoum kuba yaravugiye ku mugaragaro yamagana umutwe w’abacancuro b’abarusiya, Wagner, wahawe akazi na Mali ko gufasha kurwanya inyeshyamba muri icyo gihugu. Mali ivuga abagize uwo mutwe Wagner, bahari “nk’abatoza”. (Reuters)
Facebook Forum