Ishami rya ONU ryita ku buzima OMS, rivuga ko icyorezo cya COVID-19, cyasubije inyuma ibikorwa byo kurwanya malaria by’umwihariko muri Afurika. Cyakora raporo y’uyu mwaka ku ndwara ya malariya kw’isi, ivuga ko ibihugu byabashije kugabanya intambamyi ku bikorwa byo gukumira, gupima no kuvura iyi ndwara.
Mu 2019, mbere y’uko icyorezo cyaduka, hari abantu 568,000 bahitanywe na malaria.
N’ubwo hari icyorezo n’ibindi bikorwa byihutirwaga by’ubutabazi, amakuru ya OMS, agaragaza ko ibikorwa bihuriweho n’ibihugu, byatumye ibintu bitadogera mu bijyanye n’ingaruka za COVID 19 kw’ihagarikwa rya serivisi zatangwaga ku ndwara ya malariya.
Abayobozi muri OMS, bavuga ko isi yabashije ahanini kubumbatira byinshi byari byaragezweho mu rugamba kuri malariya mu myaka 20 ishize.
Abdisalan Noor, umuyobozi wa programu ya OMS, mu gashami gashinzwe gutanga amakuru ku ndwara ya malariya kw’isi, avuga ko umubare w’abarwayi ba malariya wiyongereye mu mwaka wa mbere w’icyorezo. Ariko agasobanura ko umubare w’abarwayi mu mwaka ushize wakomeje kuba umwe n’uwo mu 2020.
Noor ati: “Muri rusange, cyakora icyorezo no kuba cyarahagaritse ibikorwa, cyongereye uburemere bw’indwara ya malariya ku myaka ibiri ishize. Kandi tugereranya ko abantu babarirwa mu 63,000 bahitanywe n’iyo ndwara na miliyoni hafi 13 z’abantu barwaye, bishyirwa kw’ihagarikwa rya serivisi mu gihe cy’icyorezo cya COVID-19.
Uyu muyobozi avuga ko, impfu nyinshi n’abarwayi babonetse mu karere k’ubuzima ka OMS muri Afurika. Anavuga ko ibyagezweho mu guhagarika indwara ya malariya bikomeje.
N’ubwo hari ibibazo byaturutse ku cyorezo, Noor avuga ko hafi miliyoni 300 z’inzitiramibu ziteye umuti, zatanzwe mu miryango ishobora kwibasirwa n’iyo ndwara. Avuga ko gukoresha inzitiramibu, bibonwa nk’uburyo bufite akamaro kanini mu kurwanya malariya kandi igabanuka ry’ubushobozi bwazo riteye impungenge.
Abayobozi muri OMS, bavuga ko inzitiramibu ziteye umuti hamwe n’uburyo bushya bwo kurwanya ibifasha indwara gukwirakwira biri hafi kugerwaho. Bavuga ko bitarenze impera z’umwaka utaha, urukingo rwa malariya kw’isi ruzaba ruhabwa miliyoni z’abana bashobora kwibasirwa ku rusha abandi n’indwara n’abashobora gupfa biturutse kuri malariya. Banavuga ko izindi nkingo za malariya zishobora kurengera ubuzima, nazo zirimo gukorwa. (VOA News)
Facebook Forum