Perezida mushya wa Burkina Faso, Captain Ibrahim Traore yabwiye ijwi ry’Amerika mu kiganiro cyihariye ko adashakisha intambara n’abashyigikiye uwo yahiritse ku butegetsi mu mpera z’icyumweru gishize. Yavuze ko intambara we n’ingabo ayoboye barwana atari iyo gutegeka.
Ku wa gatanu w’icyumweru turangije abayobozi ba gisirikare batangaje ko bahiritse ku butegetsi Paul-Henri Sandaogo Damiba, bavuga ko yananiwe guhosha imvururu ziterwa n’abarwanyi ba Kisilamu.
Yavuze ko ashaka kurengera abaturage ba Burkina Faso yemeza ko barembejwe n’umutekano muke, ubukene, n’inzara. Liyetona coloneli Paul-Henri Sandaogo Damiba yafashe ubutegetsi mu kwezi kwa mbere ahiritse ku butegetsi Perezida Roch Marc Christian Kabore amushinja kunanirwa guhosha imvururu ziterwa n’abarwanyi ba Kisilamu.
Ibiro ntaramakuru by’Abafaransa AFP byatangaje ko ubuyobozi bwa gisirikare muri Burkina Faso bwavuze ko nta hirikwa ry’ubutegetsi ryabaye muri icyo gihugu ahubwo ari ukutumvikana kw’igisirikare. Ubufaransa bwo bukomeje kwemeza ko nta ruhare ingabo zabwo zagize mu gikorwa cyo guhirika ubutegetsi, buhakana ibikomeje kugaragara ku mbuga nkoranyambaga ko bwabigizemo uruhare.
Liyetona coloneli Paul-Henri Sandaogo Damiba we yanditse ku rubuga rwa Facebook rwa Prezidansi ko abamurwanya bakwiriye gukanguka bakirinda guteza intambara idakenewe muri Burkina Faso.
Traore yabwiye Ijwi ry’Amerika ko we n’abo ayoboye badaharanira ubutegetsi ahubwo ko bategereje inama y’igihugu izashyiraho perezida.
Facebook Forum