Ukraine: Ingwano Yakaze mu Karere ka Kherson

Muri Ukraine, ibiro bya Perezida Volodymyr Zelenskyy biratangaza ko imirwano ikaze cyane mu karere k'umujyi wa Kherson, mu majyepfo y'igihugu, kamaze igihe mu maboko y'ingabo z'Uburusiya.

Ingabo z'Uburusiya zafashe umujyi wa Kherson mu ijoro ryo ku itariki ya 2 rishyira iya gatatu mu kwezi kwa gatatu k'uyu mwaka. Ni wo mujyi ukomeye zafashe bwa mbere zikimara kugaba igitero muri Ukraine, ku itariki ya 24 y'ukwa kabiri gushize. Kherson yari ituwe n'abantu 280,000 mbere y'intambara.

Ejo kuwa mbere, Ukraine yatangije ibitero bikaze byo kwigarurira Kherson. Mu ijambo yaraye agejeje ku baturage be mu ijoro ryakeye, Perezida Volodymyr Zelenskyy yavuze ko "Ukraine izashushubikanya ingabo z'Uburusiya izisohore ku mupaka." Ati: "Niba bashaka kubaho, nibiruke hakiri kare."

Ku rundi ruhande, minisiteri y’ingabo z’Uburusiya yemeza ko zaburijemo ibitero bya Ukraine, kandi ko Ukraine yahatakarije abasilikare batabarika.” Naho Leta zunze ubumwe z’Amerika ivuga ko izamenya neza iby’imirwano y’i Kherson “byibura mu masaha 24 kugera kuri 36 ari imbere.”