Uko wahagera

Abandura Covid-19 Bongeye Kwiyongera mu Bushinwa


Bamwe mu bakorera mu gisata c'amagara y'abantu bapima abanduye corona mu Bushinwa

Mu Bushinwa, Covid 19 yongeye kubura umutwe. Umubare w'abandura Covid 19 mu Bushinwa wikubye kabiri kuri uyu wa kabiri mu gihe iki gihugu gikomeje guhangana n'iki cyorezo kimaze imyaka ibiri.

Akanama gashinzwe ubuzima mu Bushinwa katangaje ko abantu bagera ku 3507 banduye iyi ndwara bushyashya mu gihe cy'amasaha 24 ashize. Aba barenze kure abagera ku 1337 bari basanzwe babarurwa ku munsi.

Ubwiyongere bw'abakomeza kwandura iyi ndwara bwatumye Ubushinwa bushyiraho amabwiriza atandukanye yo kwirinda ikwirakwira ry'iyi virusi. Abategetsi bo mu ntara ya Jilin bahagaritse ingendo z'abayituye zaba iz'imbere mu ntara cyangwa iziyisohokamo. Agace ka Changchun, umurwa mukuru w'iyi ntara gatuwe n'abagera kuri miliyoni 9 kazahajwe n'iki cyorezo kurusha ahandi, ubu kari muri 'guma mu rugo'.

Mu ntara ya Guangdong iri mu burasirazuba bushyira amajyepfo, ahabarizwa umujyi wa Shenzhen uzwiho kuba izingiro ry'ikoranabuhanga n'inganda mu Bushinwa, ubu bahagaritse ibikorwa mu rwego rwo kugerageza gukoma imbere ikwirakwira ry'iki cyorezo. Uyu mujyi wa Shenzhen wegeranye n'uwa Hong Kong ubarizwamo ibigo bikomeye nka Tencent, Huawei na Foxconn ikorana bya hafi n'ikigo Giant Apple cyo muri Amerika.

Hagati aho indege zari ziteganyijwe kugera i Shanghai zivuye mu mahanga n'imbere mu gihugu zirimo koherezwa mu bindi bice by'Ubushinwa mu gihe aka gace kagize izingiro ry'ubukungu bw'Ubushinwa gakomeje guhangana n'ikiza cya Covid 19 cyongeye kubura umutwe.

Facebook Forum

XS
SM
MD
LG