Uko wahagera

Uburusiya Bwaba Bwadohoreye Abasivili Bahunga Intambara muri Ukraine


Abaturage ba Ukraine bahunga intambara mu mujyi wa Irpin hirya gato y'umurwa mukuru Kyiv taliki 8 z'ukwa gatatu 2022.
Abaturage ba Ukraine bahunga intambara mu mujyi wa Irpin hirya gato y'umurwa mukuru Kyiv taliki 8 z'ukwa gatatu 2022.

Abasivili bari mu bice bimwe bya Ukraine byagoswe n'ingabo z'Uburusiya bashoboye kubivamo kuri uyu wa kabiri. Bahunze bari muri za bisi abandi bigenza n'amaguru mu gihe cy'ihagarikwa ry'imirwano by'agateganyo.

Bamwe mu bashoboye kuhava bari baturutse mu mujyi wa Sumy wari umaze guterwa n'indege z'abarusiya zimishamo urusasu rwahitanye abasivili byibuze 21 nk’uko bitangazwa n'ubutegetsi bwo muri Ukraine. Abandi bagaragaye bava mu mujyi wa Irpin hafi ya Kiev, umurwa mukuru wa Ukraine.

Ministeri y'ingabo y'Uburusiya yatangaje ko iri bwongere amayira abasivili bashobora kunyuramo bahunga mu mijyi ya Chernihiv, Kharkiv na Mariupol.

Mu byumweru bibiri bishize ahandi hose abasivili bagerageje kunyura bahunga intambara muri Ukraine, harimo no muri uwo mujyi wa Mariupol, bagubwaga gitumo n'ibitero by'ingabo z'Uburusiya.

Minisitiri w'Ububanyi n'amahanga wa Ukraine, Dmytro Kuleba, kuri uyu wa kabiri yashinje Uburusiya gufatira bunyago abaturage bagera ku 300 000 mu mujyi wa Mariupol babuza abakozi b'ubutabazi kubahungisha.

Facebook Forum

XS
SM
MD
LG