Inkubiri ya kane yatewe na virusi ya omicron yararangiye. Ni ko umukuru w'abahanga barwanya icyorezo cya Covid-19 muri Repubulika ya Demokarasi ya Congo, Dr Jean-Jacques Muyembe, yatangaje.
Kubera izo mpamvu, guverinoma ya Perezida Tshisekedi yakuyeho, mu gihugu hose, amategeko yashyizeho ku itariki ya 18 y'ukwezi kwa 12 gushize yabuzaga abantu gutembera kuva saa tatu y'ijoro kugera saa kumi n'imwe mu gitondo. Ariko rero, nk'uko minisitiri w'itangazamakuru, akaba n'umuvugizi wa guverinoma, Patrick Muyaya, abisobanura, iki cyemezo ntikireba intara za Ituri na Kivu ya Ruguru, zigendera ku mategeko ya gisirikare.
Minisitiri Muyaya avuga kandi ko abaturage batagomba kwirara. Ati: "Ni ukwitonda kuko dushobora kugwirirwa n'inkubiri ya gatanu. Bityo, udupfukamunwa n'amazuru turacyari itegeko aho abantu bakorera, amashuli, kaminuza, kiliziya n'insengero, mu maguriro no mu buriro, mu mabanki, ibitaro, ahabera imikino, mu bwikorezi bw'abagenzi, amacumbi rusange, n'inyubakwa za leta."
Uretse amategeko yabuzaga abantu gutembera nijoro, guverinoma ya Repubulika ya Demokarasi ya Congo yakuyeho kandi n'itegeko ryo gupima Covid-19 abagenzi binjira mu gihugu bikingije 100%.
VOA/AF
Facebook Forum